Umusingi

Please enter banners and links.

Umutoza wa Rayon Sports mushya, Olivier Karekezi, yageze i Kigali kuri uyu wa Gatanu tariki 28 Nyakanga 2017 atangaza ko yiteguye guhindura byinshi mu ikipe ya Rayon Sports.

Karekezi yasesekaye i Kigali ku kibuga cy’indege i Kanombe saa saba n’iminota 45 z’ijoro ari kumwe n’umuryango we; umugore we Niwin Sorlu Karekezi n’abana babo babiri, yakiriwe n’abafana ba Rayon Sports bayobowe na Muhawenimana Claude ndetse n’Umunyamabanga w’iyi kipe, Gakwaya Olivier n’umutoza uzamwungiriza, Ndikumana Hamad Katauti.

Karekezi Olivier yemejwe nk’umutoza mukuru wa Rayon Sports mu cyumweru gishize ariko bikurikirwa n’umwuka mubi watumye abafana bacikamo ibice; bamwe baramwemera, abandi bakamushidikanyaho; ubuyobozi bwose bw’iyi kipe, umuryango n’inama y’ubutegetsi buraseswa hashyirwaho inzibacyuho.

Nubwo byari byabanje gutangazwa ko Karekezi yamburwa uwo mwanya ugasubira ku isoko, mu ntangiriro z’iki cyumweru Imena za Rayon Sports zanzuye ko Karekezi agomba kuzatoza iyi kipe.

Aganira n’itangazamakuru, Karekezi yavuze ko aje muri Rayon Sports gufasha abafana gutsinda ariko yemeza ko nta gitutu kimuriho .

Umugore wa Karekezi nawe ari i Kigali

Umutoza w’ungirije Katauti yari yagiye kumutegera ku kibuga

Yagize ati “Rayon Sports ni ikipe ikina ishaka gutsinda kandi nanjye mu buzima busanzwe nkunda gutsinda, ndibaza ko icyo ari cyo cyiza kandi buri wese akeneye. Abatoza banyungirije ndabazi na bo bakunda gutsinda, kuko uramutse udatsinze mu ikipe nka Rayon Sports sinzi ibisobanuro watanga.”

Karekezi yagarutse no ku mutoza Irambona Masoudi Djuma aje gusimbura, wahesheje iyi kipe igikombe cy’Amahoro ku mwaka wa mbere ukurikiyeho ayihesha icya shampiyona, avuga ko ari ibikorwa bidasanzwe yakoze kandi abyishimira by’umwihariko nk’umuntu bakinanye bakanagirana ibihe byiza.

Abajijwe niba bitamuteye igitutu gusimbura umutoza nka Masoudi, Karekezi yagize ati “Yari nka mukuru wanjye tugikinana. Namushimira uburyo yitwaye, uko yatsindaga ariko njye nta gitutu kindiho ahubwo navuga ko gifitwe n’abayobozi ba Rayon Sports kuko nibampa ibyo mbasaba nanjye nzakora ibishoboka kugira ngo ntsinde.”

Yavuze ko nubwo yageze mu Rwanda bwije, ariko kuri uyu wa Gatanu saa tatu bitamubuza kujya gukoresha imyitozo ye ya mbere nyuma y’aho iyi kipe yari imaze iminsi ibiri ikoreshwa na Katauti uzamwungiriza.

Nubwo yatoje amakipe y’abana muri Suede aho yabaga, uyu mutoza ufite impamyabumenyi yo ku rwego rwa A ya UAFA, amateka akomeye yayakoze nk’umukinnyi haba mu Mavubi, muri APR FC yakiniye (1998 – 2004); Helsinborg (2005-2007) Hamarkameratene (2007-09); Östers IF (2010-2011); APR FC (2011-12); Club athlétique Bizertin (2012-13); Trelleborgs FF (2014) na Råå Idrottsförening ari nayo yasorejemo gukina.

Karekezi akaba yahoraga yifuza kuza guteza imbere umupira w’amaguru mu Rwanda none ikifuzo cye kikaba cyagezweho ahasigaye akaba ariwe kwiyerekana ko ashoboye.

2,713 total views, 1 views today