Umusingi

Please enter banners and links.

Kuwa 2 Kamena 2017 abahoze ari abayobozi muri ADEPR, basohowe muri gereza bajya guhererekanya ububasha n’ubuyobozi bushya bwashyizweho mu ntangiriro z’iki cyumweru.

Iri hererekanyabubasha ryabereye mu muhezo, abanyamakuru bari hanze y’ibiro bikuru by’iri torero biherereye ku Kimihurura. Kuri ibi biro, hari hakajijwe umutekano ku marembo, abacungagereza barimo imbere mu nyubako ndetse imodoka yabo yari iparitse hanze.

Abaregwa bari bambaye imyenda y’iroza iranga imfungwa n’abagororwa. Imodoka ya Polisi nayo yahageze itwaye Bishop Sibomana utaragera imbere y’urukiko kugeza ubu.

Abagize Inteko Rusange ya ADEPR ku wa Kabiri, tariki ya 30 Gicurasi 2017, bahuriye mu nama idasanzwe yabereye ku Gisozi, batoye Rev. Karuranga Ephraim nk’Umuvugizi mukuru  w’iri torero, Umuvugizi Wungirije yabaye Rev. Karangwa John (wari umuyobozi mu rurembo rwa ADEPR Uganda); Umunyamabanga Mukuru aba Pasiteri Ruzibiza Viateur wakoraga mu Ishami ry’ivugabutumwa ashinzwe urubyiruko.

Ushinzwe Imari n’Ubutegetsi watowe ni Umuhoza Aulerie wari usanzwe ari umukirisitu wa Paruwasi ya Remera; Umujyanama yabaye Pasiteri Nsengiyumva Patrick wari Umuyobozi w’urubyiruko rwa ADEPR ku rwego rw’igihugu.

Ihererekanyabubasha ryakozwe kuri uyu wa Gatanu ntiryarangiye, hatanzwe ibiro n’imodoka z’iri torero.

Uwari Umuvugizi wa ADEPR, Bishop Sibomana Jean, yatawe muri yombi mu cyumweru gishize, akurikiye uwari Umwungirije Bishop Tom Rwagasana; wari Ushinzwe Ubuzima bw’Itorero rya ADEPR; Mutuyemariya Christine wari Ushinzwe Ubutegetsi n’Imari; uwahoze ari Umunyamabanga Mukuru wa ADEPR, Sebagabo Léonard; Sindayigaya Théophile; Niyitanga Straton na Gasana Valens bakatiwe gufungwa by’agateganyo iminsi 30.

Aba bakatiwe gufungwa by’agateganyo bajuririye iki cyemezo mu Rukiko Rukuru ku munsi wejo hashize tariki 1 Kamena .

Mu iburanisha ry’ejo hashize bagaragaza ko ibyaha bashinjwa birimo kunyereza umutungo bishingiye ku cyo bita akagambane ,amatiku ndetse bavugamo ko Nzahura torero ariyo nyirabayazana.

Aba bahoze ari abayobozi ba ADEPR byagaragaye ko batashakaga ko bafotorwa bambaye umwambaro uranga imfungwa n’abagororwa nkuko camera zabafashe bazihisha ndetse no ku rukiko Tom Rwagasana yagiye kwihagarika ahishe amaso ndetse yabanje gutuma abakobwa 4 bari bahari kujya kuganiriza abanyamakuru bari bahari kugirango bajijishe abanyamakuru abone uko anyuraho batamufotoye kimwe na Christine.

Gatera Stanley

3,296 total views, 3 views today