umu amakuru- Rugwiro Hervé wa Rayon Sports yafunguwe | Umusingi

Rugwiro Hervé wa Rayon Sports yafunguwe

Please enter banners and links.

Kuri uyu wa gatanu tariki 3 Mutarama 2020 ,Myugariro wa Rayon Sports, Rugwiro Hervé, wari umaze ibyumweru bibiri afungiwe i Rubavu, yafunguwe nyuma y’umwanzuro w’Urukiko rw’Ibanze rwa Gisenyi rwumvise ikirego cy’Ubushinjacyaha buregamo uyu mukinnyi wa Rayon Sports kwambuka umupaka akoresheje inyandiko mpimbano no kwambuka mu buryo butemewe n’amategeko.

Rugwiro Hervé yafatiwe ku mupaka wa Petite barrière i Rubavu tariki ya 17 Ukuboza avuye muri Repubulika Iharanira Demokarasi ya Congo, yambuka agana mu Rwanda.

Mu rubanza rwabaye ku wa Kabiri, Ubushinjacyaha bwamureze ibyaha byo kwambuka umupaka nta byangombwa, nta n’uburenganzira bw’Urwego rushinzwe Abinjira n’Abasohoka afite, bumusabira gufungwa by’agateganyo.

Umwunganizi wa Rugwiro mu mategeko, Me Zitoni Pierre Claver usanzwe ari Umunyamategeko wa Rayon Sports, yavuze ko umukiliya we nta cyaha amubaraho kuko ikarita y’itora ya Repubulika Iharanira Demokarasi ya Congo ayifite mu buryo bwemewe n’amategeko akaba ayimaranye igihe kinini.

Yari yasabye urukiko kureba neza mu bushishozi bwarwo byibuze rugatanga n’ingwate zitandukanye kuko hari umubyeyi we, umuryango mugari wa Rayon Sports ndetse na we ubwe (umunyamategeko) bamukeneye kandi biteguye kumwishingira.

Kuri uyu wa 3 Mutarama 2020 nibwo Urukiko rwanzuye ko uyu mukinnyi arekurwa agakomeza kuburana ari hanze.

Byari biteganyijwe ko isomwa ry’uru rubanza riba saa tanu z’amanywa kuri uyu wa Gatanu ariko ryimurirwa saa Cyenda.

Inshuti n’umuryango wa Rugwiro Hervé barimo umubyeyi we, mushiki we n’umufasha we bari mu rukiko aho bumviye umwanzuro w’ubucamanza. Ahagana saa cyenda n’iminota 20 nibwo Inteko y’Abacamanza yahageze.

Abiganjemo abafana ba Rayon Sports bari benshi ahabereye urubanza rwa Rugwiro

Umuvugizi wa Rayon Sports, Nkurunziza Jean Paul, yavuze ko bishimiye umwanzuro w’urukiko

Rugwiro yabanje kubwirwa imyirondoro ye, anamenyeshwa ibyaha akurikiranyweho byo gukoresha inyandiko mpimbano no kwambuka umupaka binyuranyije n’amategeko.

Uyu mukinnyi yambutse ava mu Rwanda atanyuze ahabugenewe agaruka bucyeye, yitwaje ikarita ya Repubulika Iharanira Demokarasi ya Congo, nayo ifite imyirondoro itandukanye n’iye izwi.

Rugwiro Hervé Amadeus, yireguye avuga ko iyo karita yayifashe agikinira APR FC ubwo yajyaga gukina muri Congo Brazzaville. Iyo karita kuko yari iriho amakosa yarayambukanye agiye kuyikosoza ariko mu kugaruka asanga umukozi w’Urwego rushinzwe Abinjira n’Abasohoka wamutambukije adahari.

Umwunganizi we yavuze ko “Kuba yarafatanywe ikarita y’itora ya Congo si icyaha kuko u Rwanda rwemera ubwenegihugu bubiri naho ku nyandiko mpimbano yerekana ko ikarita yatanzwe mu 2017. Ku kuba Ambasade y’u Rwanda muri congo yaravuze ko ari impimbano nabyo ntabwo byagenderwaho.’’

Urukiko rwasanze Rugwiro Hervé atarambutse binyuranyije n’amategeko kuko ntaho agaragara mu bambutse. Rwemeje ko nta mpamvu zifatika zatuma afungwa mbere y’urubanza mu mizi, rwanzura ko afungurwa.

Umuvugizi wa Rayon Sports, Nkurunziza Jean Paul, yabwiye itangazamakuru ko ikipe yishimiye icyemezo cy’urukiko no kuba umukinnyi agarutse mu ikipe.

Yagize ati ‘‘Rayon Sports ni umuryango, twamubaye (Rugwiro) hafi . Turashima Imana kuba arekuwe akaba aje mu ikipe.’’

Rugwiro Hervé ni umukinnyi wa Rayon Sports guhera muri Nyakanga uyu mwaka, aho yayisinyiye imyaka ibiri nyuma yo gutandukana na APR FC.

Uyu mugabo ukomoka i Huye, yatangiriye umupira we mu kigo kizamura impano z’abana cya Kabutare, atozwa n’umutoza Katibito Byabuze.

Yahavuye mu 2009 ajya mu Ishuri ry’Umupira rya APR FC ndetse ayikurikiramo, atangira gukinira ikipe nkuru mu 2013 mu gihe yayivuyemo nyuma y’imyaka 10 muri Kamena uyu mwaka, yirukanywe kimwe na bagenzi be 15.

Rugwiro Hervé yatangiye guhamagarwa mu Ikipe y’Igihugu ‘Amavubi’ mu 2014.

 

 

501 total views, 1 views today

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.