Umusingi

Please enter banners and links.

Ikipe ya Mukura VS ihagarariye u Rwanda muri CAF Confederation Cup yitwaye neza mu mukino w’ijonjira rya kabiri ry’iri rushanwa, inganya na Hilal El Obeid 0-0 mu mukino ubanza wabereye muri Sudani.

Kuri uyu wa Gatandatu tariki 15 Ukuboza 2018 kuri Shikan Castle Stadium iri mu Ntara ya ‎North Kurdufan iri mu Majyaruguru ya Sudani niho habereye uyu mukino witabiriwe n’abasaga ibihumbi 20 by’abatuye Umujyi wa Obeid.

Mukura VS yegukanye igikombe cy’Amahoro 2018 biyihesha guhagararira u Rwanda mu marushanwa ya CAF ikomeje kwitwara neza kuko yasezereye Free State Stars yo muri Afurika y’Epfo mu ijonjora ry’ibanze ku giteranyo cy’igitego kimwe ku busa mu mikino yombi.

Mu ijonjora rya kabiri Mukura VS itozwa n’Umurundi Francis Haringingo yakinnye na Hilal El Obeid yakoze impinduka mu bakinnyi bari basanzwe babanza mu kibuga kuko Munyakazi Yussuf Lule yari yafashe umwanya wa Nkomezi Alexis naho Lomami Frank afata umwanya wa Onesme Twizerimana.

Igice cya mbere cy’uyu mukino ikipe ya Hilal El Obeid yakihariye ariko ntiyashobora kureba mu izamu rya Omar Rwabugiri ahubwo Mukura VS yacungiraga kuri ‘contre attaque’ iyirusha kugera ku izamu inshuro nyinshi nko ku munota wa 16 aho Lomami Frank yafashe umupira awuhawe na Bertrand Iradukunda agatungurana atera ishoti rikomeye ariko rikubita igiti cy’izamu.

Amahirwe make ya Mukura VS yatumye igice cya mbere kirangira ari 0-0, biranayikomerera mu gice cya kabiri kuko ikipe yari mu rugo yakoresheje imbaraga nyinshi isatira ishaka impamba yo kuzazana mu Rwanda.

Haringingo yabonye asumbirijwe yongera imbaraga mu bwugarizi aho yakuyemo kapiteni Ciza Hussein Mugabo ashyiramo Umurundi Iddy Said Djuma, Nkomezi Alexis asimbura Christopher Ndayishimiye naho myugariro Hatungimana Basile wari umaze amezi 10 asimbura rutahizamu Iradukunda Bertrand.

Byatanze umusaruro kuko Mukura VS yashoboye kwihagararaho umukino urangira ari 0-0. Umukino wo kwishyura uzabera kuri Stade Huye tariki 22 Ukuboza 2018 saa 15:30. Ikipe izarokoka muri izi izaba isigaje gusezerera ikipe imwe igahita ijya mu matsinda ya CAF Confederation Cup 2019.

Abakinnyi 11 babanje mu kibuga muri Mukura VS

Umunyezamu: Omar Rwabugiri

Ba myugariro: Hassan Rugirayabo, Nshimirimana David, Iragire Saidi, na Mutijima Janvier

Abakina hagati: Munyakazi Yussuf Lule, Gael Duhayindavyi, Ciza Hussein Mugabo, na Bertrand Iradukunda

Ba rutahizamu: Christopher Ndayishimiye na Lomami Frank

3,310 total views, 1 views today