umu amakuru- Urubanza rwa RNC: Abafashwe bagaruwe mu rukiko bambitswe imyambaro y’imfungwa za gisirikare. | Umusingi

Urubanza rwa RNC: Abafashwe bagaruwe mu rukiko bambitswe imyambaro y’imfungwa za gisirikare.

Please enter banners and links.

(Rtd) Maj. Mudasiru arasaba ko we na bagenzi be baburana nk’Abasivili

Kuri uyu wa mbere  tariki 14 Ukwakira 2019 Urubanza ruregwamo abahoze mu mutwe wa RNC ya Gen.Kayumba Nyamwasa bafatiwe ku rugamba muri Congo Kinshasa rwakomeje baraburana  ifunga n’ifungurwa by’agateganyo.

Bagaruwe mu rukiko bambitswe imyenda y’imfungwa z’agisirikare aho Rtd Maj. Habib Mudasiru yasabye ko we na bagenzi be baburanishwa nk’abasivile. Inteko y’abacamanza batatu bayobowe na LT.Col Charles Madudu yinjiye mu cyumba k’iburanisha Saa yine.

Umucamanza yabajije impande zombi, abaregwa n’ubushinjacyaha bwa Gisirikare niba ziteguye kuburana. Ubushinjacyahaha buhagarariwe na Major Ruyonza Denny na Capt. Rugamba Jacques bwahise bubwira Urukiko ko uwitwa Habyarimana Jean Bosco ataje mu Rukiko kuko arwaye, bunagaragaza ko hari abandi batatu bataburana badafite Abanyamategeko babunganira, abo ni Nsengiyumva Janvier, Nsabimana Jean Marie na Rugendo Yisa.

Amwe mu mafoto ubushize aba bo muri RNC bazanywe mu rukiko bambaye gisivili

Aba uko ari batatu bunganirwa na Me Butera Dismas akaba ataje kubunganira uyu munsi.

Abunganira abaregwa babwiye Umucamanza ko Urukiko rwa Gisirikare rwatangiye kuburanisha uru rubanza ku ikubitiro haburanwa ifunga n’ifungurwa by’agateganyo, ko rudafite ububasha bwo kuburanisha uru rubanza, ku mpamvu y’uko abaregwa ari Abasivili.

Ubushinjacyaha bugifite ijambo bwabwiye Urukiko ko hari Umusirikare witwa Private Muhire Dieudonne na we ufite bagenzi be, batanu bareganwa na we akaba yarafashwe mbere y’uko ababurana uyu munsi bafatwa, bukavuga ko bahuje dosiye ku mpamvu y’uko bakoranye ibyaha, bityo ngo bahisemo ko baburanishwa n’Urukiko rwa Gisirikare.

Rtd Major Mudasiru Habib usa naho ari we mukuru muri iri tsinda ry’abantu bo muri RNC, Leta ivuga ko bafatiwe muri Congo Kinshasa, yatse ijambo abwira Umucamanza ko uwo musirikare wafashwe mbere ntaho amuzi, ko yabazwa ibyo yakoze na bagenzi be bafatanywe, Mudasiru Habib na we n’abo bari kumwe bakabazwa ibyabo.

Yavuze ko we n’abo bareganwa baburanishwa m’Urukiko rwa Gisivili kuko we, ngo yamaze gusezererwa mu ngabo.

Umucamanza yumvuse impande zombi avuga ko inteko igiye kwiherera ikaza kugaruka isoma umwanzuro.

Iburanisha ryamaze isaha, uyu munsi abaregwa baje mu Rukiko bambaye imyenda iranga imfungwa z’Abasirikare.

Mu ibaranisha riheruka aba bantu bashinjwa kuba mu mutwe wa RNC ya Kayumba Nyamwasa baje bambaye gisivili ariko uyu munsi bikaba byahindutse bambitswe imyambaro y’imfungwa z’agisirikare hibazwa niba nabo bafatwa nk’abasirikare.

 

1,243 total views, 5 views today

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.