Champions League: Real Madrid byari biyikomeranye , Manchester City na Tottenham ziyongereye ku makipe yageze muri 1/8 (Amafoto)

Champions League: Real Madrid byari biyikomeranye , Manchester City na Tottenham ziyongereye ku makipe yageze muri 1/8 (Amafoto) | Umusingi

Champions League: Real Madrid byari biyikomeranye , Manchester City na Tottenham ziyongereye ku makipe yageze muri 1/8 (Amafoto)

— November 27, 2019

Please enter banners and links.

Imikino y’umunsi wa gatanu w’amatsinda ya UEFA Champions League yabaye kuri uyu wa Kabiri yasize Real Madrid, Manchester City na Tottenham Hotspur na yo akomeje muri 1/8 cy’iri rushanwa rihuza amakipe y’ibihangange i Burayi.

Mu mukino wari utegerejwe na benshi wabaye kuri uyu wa Kabiri, mu itsinda A, Real Madrid yari yakiriye Paris Saint-Germain, amakipe yombi anganya ibitego 2-2.

Real Madrid yari ku kibuga cyayo, yafunguye amazamu ku munota wa 17 ku gitego cyatsinzwe na Karim Benzema ndetse uyu Mufaransa aza no gutsinda icya kabiri munota wa 79 biba ibitego 2-0.

Paris Saint-Germain yabyishuye mu minota ya nyuma, ibifashijwemo na Kylian Mbappé ku munota wa 81 na Pablo Sarabia ku wa 83.

Iyi kipe yo mu Bufaransa yamaze kwizera kuzamuka iyoboye itsinda A mu gihe Real Madrid izazamuka ari iya kabiri.

Mu itsinda B, José Mourinho watoje Tottenham umukino wa mbere muri UEFA Champions League, yatsinze Olympiacos ibitego 4-2 mu gihe Bayern Munich yanyagiye Crvena Zvezda ibitego 6-0 birimo bine bya Robert Lewandowski.

Bayern Munich ya mbere n’amanota 15 yamaze kwizera kuzamuka iyoboye itsinda mu gihe na Tottenham yagize 10, ikazamuka ari iya kabiri nubwo hasigaye umukino umwe.

Mu itsinda C, Atalanta yatsinze Dinamo Zagreb ibitego 2-0 naho Manchester City ibona itike ya 1/8 nyuma yo kunganya na Shakhtar Donetsk igitego 1-1.

Mu itsinda D, Juventus yazamutse iyoboye itsinda nyuma yo gutsinda Atlético Madrid igitego 1-0 cyatsinzwe na Paulo Dybala ku munota wa 45 w’umukino mu gihe Bayer Leverkusen yatsindiye Lokomotiv Moscow mu rugo ibitego 2-0.

Mu matsinda ane abanza yakinnye kuri uyu wa Kabiri, amakipe atandatu yamaze kugera muri 1/8 ni Paris Saint-Germain, Real Madrid, Bayern Munich, Tottenham, Manchester City na Juventus.

Kuri uyu wa Gatatu harakinwa umunsi wa gatanu kuva mu itsinda E kugeza mu itsinda H.

4,035 total views, 3 views today