Umusingi

Please enter banners and links.

Kuri uyu wa mbere tariki 3 Mata 2017 urwego rw’Igihugu rushinzwe Imfungwa n’abagororwa rwatangaje ko hakoreshejwe ingufu mu guhosha imyigaragambyo ikomeye  y’abagororwa bo muri Gereza ya Gasabo(Kimironko), bigaragambije batera amabuye n’inkwi mu muhanda no ku nzu z’abaturage zegeranye nayo.

Ubwo iyo myigaragagambyo yari irimbanyije mu ma saa tatu, inzego z’umutekano, igisirikare, polisi n’Urwego rushinzwe amagereza RCS, zatabaye.Ibi bije nyuma yaho mu minsi mike ishize iyo gereza yari yafashwe n’inkongi y’umuriro.

Bamwe mu bapolisi bahosheje imyigaragambyo

Amabuye yaterwaga mu muhanda

Zimwe mu nzu zatewe amabuye zituriye gereza

Ukigera ku muhanda unyura imbere y’iyi gereza, wakirwaga n’amabuye menshi awuzuyemo ndetse n’inkwi , abagororwa bagiye bajugunya bikayirenga ndetse bikanafata amazu akorerwamo n’abaturage, hamwe ibirahuri birameneka ku buryo ibikorwa byabo byasaga n’ibyahagaze kubera ubwoba.

Aba bakuburaga umuhanda wari watewemo amabuye menshi

Nubwo itangazamakuru ryari hanze ya gereza ritegereje icyo inzego zitangaza kuri iyo myigaragambyo. Umuvugizi w’Urwego rw’Igihugu rushinzwe Imfungwa n’abagororwa, CIP Hillary Sengabo, yavuze ko hakorehejwe ingufu z’abapolisi bahuguriwe guhosha imyigaragambyo n’abacungagereza mu kuyihagarika.

Yagize ati “Abigaragambyaga ntabwo bari benshi ni uko gusa babikoreraga imbere, ariko twabashije kugeramo turabihosha.”

Abajijwe uburyo bwakoreshejwe mu kuyihosha, CIP Sengabo yagize ati “Ni imyuka iryana mu maso ku buryo nta ngaruka uretse kuba warira mu maso ariko nta sasu ryica cyangwa iri risanzwe ryakoreshejwe.”

Iyi myuka ikunda gukoreshwa no mu bindi bihugu mu guhosha imyigaragambyo kandi ntigire icyo itwara uretse kuryana mu maso.

Umuvugizi w’Urwego rw’Igihugu rushinzwe Imfungwa n’abagororwa, CIP Hillary Sengabo yavuze ko imaze guhoshwa, abagororwa bakoreshejwe inama n’umuyobozi kuva ku rwego rw’Umujyi wa Kigali.

Icyo abo bagororwa bagaragaje nk’intandaro yo kwigaragambya, ni ibikoresho bahawe na gereza nyuma y’uko yibasiwe n’inkongi y’umuriro bavuga ko ibyo bahawe bidahagije.

Ariko CIP Hillary Sengabo, yavuze ko nubwo abakoze ibyo bikorwa bitwaza ko ibikoresho bahawe bidahagije, bamenye ko n’ubundi bari basanzwe bafite imyitwarire mibi.

Ati “Imyigaragambyo yabaye gusa nyuma y’isaha imwe twabashije kuyihosha ku buryo abayobozi babaganirije kugira ngo bumve ikibazo bari bafite, ariko twaje gusanga abayigizemo uruhare bari hagati ya 30 na 50 ntabwo ari bose.Andi makuru yavugaga ko bagera ku 100 . Gereza imaze gushya twabahaye inkunga z’ibikoresho by’ibanze nk’amahema, uburingiti, imyambaro, amasabune n’amasahani yo kuriraho; abo bashaka kuririra kuri uko gushya kwa gereza bakavuga ko ibyo bikoresho bidahagije.”

Yakomeje agira ati “Nubwo tukiri kubikurikirana, usanga ari agatsiko n’ubundi katitwaraga neza muri gereza, bagashaka kuririra ko gereza yahiye bagateza umutekano muke urebye abantu umuriro wagizeho ingaruka [abagororwa barenga 2000] ni benshi cyane ugereranyije n’abigaragambije, ntabwo ari ikibazo cy’ibikoresho gusa, ni myitwarire mibi.”

CIP Sengabo avuga ko bakomeje gukora iperereza kugira ngo barebe ko niba mu bigaragambije nta muntu ubwo bufasha bw’ibanze butagezeho, gusa ngo ibyo nabwo hari uburyo bigaragazwamo atari ukwigaragambya.

Yavuze ko nyuma y’ibi bagiye kureba abakoze imyigaragambyo nta mpamvu ifatika n’uburemere bwabyo ubundi barebe ibihano babaha bijyanye n’imyitwarire.

Bite by’abaturage bangiririjwe n’amabuye yatewe n’abagororwa?

Umuyobozi w’Akarere ka Gasabo, Rwamurangwa Stephen, yatangaje ko nyuma yo kuganiriza abagororwa bagiye no kuvugana n’abaturage bagizweho ingaruka n’iyi myigaragambyo kugira ngo babahumurize no kubafasha gusubiranya ibyabo byangiritse.

Ati “Nyuma yo kuganira n’abo bagororwa bake bateje imyigaragambyo, ubu ni ukuganira n’abaturage baturiye gereza cyane abo mu gice cy’aho berekezaga amabuye no kugerageza kubafasha kuri ibyo birahuri byabo byangiritse no kubahumuriza ko ikibazo kitari gikomeye nk’uko babitekerezaga.”

Hari abantu bamwe batangarije Ikinyamakuru Umusingi ko abigaragambaje batangiye kwimurirwa mu zindi gereza.

2,556 total views, 1 views today