umu amakuru- Nyiramiruho yavuze uko yakize gereza yo mu mutima abikesha kuvuga ukuri kw’ibyo yakoze muri jenoside | Umusingi

Nyiramiruho yavuze uko yakize gereza yo mu mutima abikesha kuvuga ukuri kw’ibyo yakoze muri jenoside

Please enter banners and links.

Nyiramiruho Xaverine ni umuturage wo mu Kagari ka Sha, Umurenge wa Nduba, Akarere ka Gasabo, uhamya ko nyuma y’amahugurwa y’isanamitima yahawe yakize gereza yo mu mutima yagendanaga kubera guhisha ukuri kw’ibyo yakoze muri Jenoside yakorewe Abatutsi.

Mu buhamya yatanze ubwo kuri uyu wa Gatatu hasozwaga ukwezi k’ubumwe n’ubwiyunge mu itorero rya ADEPR, Nyiramiruho yavuze uko yakiriye mu rugendo yatangiranye na bagenzi be batandatu muri Gicurasi rwo kuvugisha ukuri no gusaba imbabazi abo bahemukiye muri jenoside.

Nyiramiruho yavuze uko muri Jenoside umwana we yagiye guca imyeyo ruguru y’urugo akabona umuntu wihishe arabimubwira undi nawe ajya kumuhururiza.

Mu buhamya bwe yagize ati “Njyewe ntabwo nabyihanganiye umugabo wanjye ntiyari ahari naragiye njya kubibwira umugabo witwa Mubiligi w’imbere y’iwacu mubwira ikintu uko kimeze arambwira ngo jya mu rugo ntacyo uba”.

Yakomeje agira ati “Nsubiye mu rugo numva abantu barasakuza ruguru y’urugo ngenda ngiye kureba nsanga ni umugabo witwa Marthazar Murinzi bahafatiye”

Mu kwicuza kwinshi, Nyiramiruho yavuze ko uwo mugabo bamujyanye bakamwica. Ati “Icyo gihe nabuze ubwenge kuko iyo ntajya kubibwira uwo mugabo ntabwo yagombaga gupfa kandi n’iyo aba n’uwonguwo na we bagombaga kumwica kubera njyewe”.

Abantu benshi bitabiriye isozwa ry’ukwezi kwahariwe ubumwe n’ubwiyunge

Bamwe mu bayobozi bitabiriye isozwa ry’uku kwezi kwatangiye muri Gicurasi

Umunyamabanga Nshingwabikorwa wa Komisiyo y’Igihugu y’ubumwe n’ubwiyunge Ndayisaba yashimye gahunda y’isanamitima ibumbatiye umusaruro mwinshi mu bumwe bw’abanyarwanda

Rev. Past Karuranga Ephrem, yavuze ko iyi gahunda yiyongera ku yindi bakorera muri za gereza(all photos internet)

Nyiramiruho yafunzwe imyaka 11 ariko agahirana gereza yo ku mutima

Umukecuru Mukamuhigi yavuze uko arimo gusoroma ku mbuto zo kubabarira abamuhemukiye

Harerimana umwe mu basabye imbabazi kubera uruhare bagize muri jenoside

Mu gihe cyo gutanga amakuru, uyu mukecuru ntiyigeze avuga icyo kintu ndetse aza gufungwa ariko akigumana ku mutima kugeza ubwo ahawe amahugurwa y’isanamitima akabohoka, akiyemeza gutura uyu mutwaro yagendanaga.

Ati “Nafunzwe imyaka 11 aho mfunguriwe nibwo nagize igitekerezo cyo kugira ngo nsobanure icyo kintu kugira ngo umutima wanjye ubohoke, nkaba nifuzaga gusaba imbabazi”.

Nyiramiruho n’abandi batandatu basabye imbabazi abo bahemukiye, umuryango nyarwanda muri rusange n’itorero kuko bakoze amahano adakwiye ikiremwamuntu.

Isanamitima ryashibutsemo imbabazi

Mahoro Emmanuela ushinzwe isanamitima n’ubwiyunge muri ADEPR, avuga ko muri uru rugendo hakozwe ibikorwa byinshi birimo kugenderera no guhugura abakoze jenoside bafunguwe bari mu itorero, ku gusaba imbabazi no kumenya uko babayeho n’ingaruka icyaha bakoze kibafiteho.

Hari ukubahuza n’abo bahemukiye ngo babohoke gereza y’umutima bafite. Ibiganiro byabayeho kandi byatanze umusaruro kuko hari abatanze amakuru y’ahantu bashyize imibiri y’abantu bishwe muri jenoside ndetse basabira n’imbabazi mu ruhame.

Niyonsaba Justine warokotse Jenoside yakorewe abatutsi, yavuze ko ibikomere bya jenoside byose byatsikamiye umutima we, akurana ubusharire bw’umutima wuzuye urwango ku buryo guseka kwe kwabaga guke mu buzima.

Avuga ko nyuma yo guhugurwa ku isanamitima yakize kuba mu itorero yiyoberanya afite ubumuga agendana bw’urwango yari afitiye abahutu, ku buryo mu isengesho rye yavugaga ngo Imana izamurinde gushaka umugabo w’umuhutu.

Ubu buzima yabubayemo kugeza ubwo gahunda y’isanamitima ije ayitabira aseta ibirenge ariko imubera umuti wo gukira ibikomere no kugarura inseko yari yarabuze mu myaka 25 ishize.

Niyonsaba ati “Twagize umwanya wo kuganira babiri babiri aho niho nakiriye nsanga babandi nita ko ari abahutu nabo bafite ubumuga nsanga nanjye mfite ubumuga turaganira dusaba imbabazi turasenga noneho nangira guseka”.

Umukecuru Mukamuhigi na we warokotse jenoside yakorewe abatutsi, yavuze uko abo mu muryango we bishwe mu 1959 ndetse no mu 1994, ariko yabohotse umutima akababarira abamuhemukiye none uyu munsi bakaba babanye neza.

Ati “Abampemukiye nabahaye imbabazi, ntabwo nazibima ngo mbone umvugisha, ibyiza rero ubu ndabura amazi nkajya kubasaba, nabura unyasiriza urukwi nkabahamagara bakarwasa, ndashima Imana”.

Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge, Fidèle Ndayisaba, yashimiye ADEPR avuga ko amadini n’amatorero afite ubushobozi, inshingano n’umuhamagaro wo gufasha abantu mu rugendo rwo komorana ibikomere.

Yavuze ko kugira ngo ibi bishoboke bishingira ku kwemera ukuri, kwicuza, gusaba imbabazi n’abazisabwa bagafashwa kugira ngo bashobore kubohoka batange imbabazi.

Ati “Ukuri no kwemera gusaba imbabazi no kuzitanga bifasha abanyarwanda kongera gusabana ariko bigafasha gusubiza bimwe mu bibazo bigaragara biteye inkeke mu mitima y’abanyarwanda kandi bibangamiye cyane urugendo rw’ubumwe n’ubwiyunge”.

Ndayisaba yavuze ko ibikorwa by’isanamitima bikemura ibibazo byo kuba hari imibiri itaraboneka ngo ishyingurwe mu cyubahiro, abakoze ibyaha bakaruhuka kugendana imirambo mu mutima ndetse bikarangiza ikibazo cy’imitungo yangijwe.

Umuvugizi w’itorero ADEPR, Rev. Past Karuranga Ephrem, yavuze ko iyi gahunda yiyongera ku yindi bakorera muri za gereza, yishimira umusaruro bitanga mu kubaka itorero, kubaka u Rwanda n’ubunyarwanda ndetse no kubohoka imitima ku ruhande rw’abakoze ibyaha n’abahemukiwe.

 

779 total views, 5 views today

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.