Umusingi

Please enter banners and links.

Majyambere Silas umunyemari wamenyekanye cyane mu Rwanda ariko ukunda kwebera mu Mujyi wa Kampala  wari wahamagajwe ahatazwi n’Urukiko rw’Ikirenga ngo azitabire inama ntegurarubanza mu rubanza aregwamo na Jean Pierre Bemba hamwe na Dunia Bakaran, yageze aho araboneka agena umuhagararira.

Urukiko ruhamagaza umuntu ahatazwi iyo rwabuze aho atuye haba mu Rwanda no mu mahanga kandi akenewe cyane mu rubanza.

Hashize igihe abanyamigabane ba Société d’Exploitation Agricole du Rwanda (E.A.R Ltd) bari mu nkiko bapfa ibibanza by’iyo sosiyete biherereye mu murenge wa Remera, Akarere ka Gasabo.

Ibyo bibanza ni umutungo wa sosiyete EAR yatangiye mu myaka ya 1990, igatangizwa na Bemba Saolana se wa Jean Pierre Bemba wabaye Visi Perezida wa RDC, Majyambere Silas, umuvandimwe we Ngendahimana Ezechiel n’abandi banye-Congo.

Mu banyamigabane b’iyo sosiyete haje kuzamo ibibazo barashwana, bamwe bavuga ko ibibanza ari ibyabo abandi bakabihakana kugeza ubwo bigeze mu Rukiko rw’Ikirenga.

Muri Gashyantare uyu mwaka Urukiko rw’ikirenga rwahamagaje Majyambere Silas ahatazwi ngo azitabire inama ntegurarubanza yabaye kuwa Gatanu tariki 31 Gicurasi 2019.

Urukiko rw’Ikirenga rwahamagaje Majyambere nyuma y’uko uwamwunganiraga mu mategeko Me Munderere Léopold agaragaje ko umukiliya we badaheruka kuvugana kuko atazi aho aherereye.

Mu nama ntegurarubanza yabaye kuri uyu wa Gatanu, Me Munderere yaje ahagarariye Majyambere, avuga ko noneho bavuganye akamuha ububasha bwo gukomeza kumuhagararira mu rubanza.

Ababuranyi bose basobanuriwe uko urubanza ruteye, abafite ibimenyetso bituzuye basabwa kubishaka bakabishyira mu ikoranabuhanga ryifashishwa mu nkiko, nyuma bakazamenyeshwa umunsi w’indi nama ntegurarubanza ari nayo izagena niba urubanza ruzakomeza cyangwa ababuranyi bashobora gukemura ibibazo bafitanye hatabayeho urubanza.

Majyambere ubwo aheruka mu Rwanda mu mwiherero w’abayobozi yemereye Perezida Kagame ko azubaka hotel y’inyenyeri 5 I Rusizi ariko kuva icyo gihe kugeza n’uyu munsi ntayo arubaka.

Ikinyamakuru Umusingi mu nkuru kigeze gusohora nyuma y’igihe cyari kibaye kirekire Majyambere atubaka hotel I Rusizi twabajije Meya wariho icyo gihe avuga ko ikibanza Majyambere yashakaga kubaho hotel kirimo amakimbirane .

8,082 total views, 3 views today