umu amakuru- Perezida Kagame yashyizeho abasenateri bane barimo Prof Dusingizemungu na Uwizeyimana Evode wasezeye ku kazi akubise umusekirite atuka n’abanyamakuru | Umusingi

Perezida Kagame yashyizeho abasenateri bane barimo Prof Dusingizemungu na Uwizeyimana Evode wasezeye ku kazi akubise umusekirite atuka n’abanyamakuru

Please enter banners and links.

Uyu munsi nibwo amakuru yasohotse ko Perezida Paul Kagame yashyizeho abasenateri bane bashya, barimo Prof Dusingizemungu Jean Pierre wayoboraga Umuryango Uharanira Inyungu z’Abarokotse Jenoside yakorewe Abatutsi (IBUKA) na Uwizeyimana Evode wigeze kuba Umunyamabanga wa Leta muri Minisiteri y’Ubutabera.

Uyu Uwizeyimana Evode yibukirwaho ko yeguye ku kazi yari afite kubera gukubita umusekirite ndetse no gutuka abanyamakuru ndetse akaba yaranenzwe cyane ku myitwarire ye no kuba Perezida yongeye kumugirira ikizere abantu bakaba basanga atari akwiye kujyanwa muri Sena nkuko abantu bakomeje ku binenga ku mbuga nkoranyambaga.

Abandi basenateri bashyizweho ni Kanziza Epiphanie na Twahirwa André.

Aba basenateri basimbuye Prof. Karangwa Chrysologue, Kalimba Zephyrin, Uwimana Consolée na Nyagahura Marguerite bari barashyizweho na Perezida wa Repubulika nyuma y’abandi, ari nayo mpamvu basoje manda nyuma ya bagenzi babo.

Prof Dusingizemungu Jean Pierre, mbere yo gushyirwaho na Perezida wa Repubulika nka senateri, yiyamamarije uyu mwanya ahagarariye Intara y’Amajyepfo, ariko ntiyabasha gitsinda. Amaze igihe kinini ari umwalimu muri kaminuza zitandukanye.

Ni mu gihe Uwizeyimana Evode wahoze ari Umunyamabanga wa Leta muri Minisiteri y’Ubutabera ushinzwe Itegeko Nshinga n’andi mategeko, yaherukaga kwegura muri Guverinoma nyuma yo gushinjwa guhohotera umukozi warindaga umutekano, ariko baza kwiyunga. Yeguriye rimwe na Dr Isaac Munyakazi ubu nawe uri mu nkiko aburana ibyaha bya ruswa.

Uwizeyimana Evode

Prof Dusingizemungu Jean Pierre

Umuhanga mu ndimi, Twahirwa André,

Kanziza Epiphanie yari Umuhuzabikorwa w’Umuryango w’abagore baharanira ubumwe, mu gihe Dr Twahirwa André ari umuhanga mu ndimi, umaze igihe aba mu Bufaransa.

Nyuma yo gushyirwa muri uyu mwanya, Uwizeyimana yanditse kuri Twitter ko ari ishema rikomeye cyane mu buzima bwe, ashimira Perezida Kagame wongeye kumugirira icyizere.

Ati “Nyakubahwa, ubu mfite imbaraga nyinshi, ishema n’ukwiyemeza gukorera igihugu cyacu turangajwe imbere n’imiyoborere yanyu myiza.”

Following my appointment to the Senate, the biggest privilege of my life, I want to express my boundless gratitude to H.E @PaulKagame for the renewed confidence. Your Excellency, I’m highly energetic, loyal, proud and committed to serving our Nation under your Great Leadership.

— Evode Uwizeyimana (@EvodeU) October 16, 2020

Kuki bashyizweho nyuma y’umwaka manda ya Sena itangiye?

Sena y’u Rwanda igizwe n’abasenateri 26 barimo 12 batorwa mu Ntara, umunani bashyirwaho na Perezida wa Repubulika, bane bashyirwaho n’Ihuriro nyunguranabitekerezo ry’Imitwe ya politiki yemewe mu Rwanda na babiri baturuka muri za Kaminuza cyangwa ibigo by’ubushakashatsi.

Mu miterere y’Umutwe wa Sena, nta na rimwe ijya ihagarika imirimo, bitandukanye n’Umutwe w’Abadepie. Bituma Abasenateri bajyaho mu bihe bitandukanye, ku buryo no mu bihe by’amatora hari aba bagikomeje manda yabo.

Ku wa 20 Nzeri 2019 nibwo Perezida Kagame yashyizeho Abasenateri bane mu munani yemererwa n’itegeko, barimo Dr. Iyamuremye Augustin (ubu ni Perezida wa Sena), Nyirasafari Espérance (ubu ni Visi Perezida wa Sena ushinzwe iby’amategeko no kugenzura ibikorwa bya Guverinoma), Habiyakare François na Dr Mukabaramba Alvera (Visi Perezida wa Sena ushinzwe imari n’abakozi).

Abandi bane bari basigaye bagombaga kujyaho nyuma y’umwaka manda nshya itangiye, hirindwa ko habaho icyuho by’umwihariko mu nshingano yo kugenzura ishyirwa mu bikorwa ry’amahame remezo no kwemeza abayobozi.

Aba basenateri bashyizweho nyuma y’uko ku wa 24 Nzeri 2020 Ihuriro ry’Igihugu Nyunguranabitekerezo ry’Imitwe ya Politiki yemewe mu Rwanda, ryatoreye Mukakarangwa Clotilde na Mugisha Alexis kwinjira mu Nteko Ishinga Amategeko, Umutwe wa Sena ndetse bemejwe n’Urukiko rw’Ikirenga.

Basimbuye Uyisenga Charles na Mukakalisa Jeanne D’Arc, nabo basoje manda nyuma y’umwaka umwe kuri bagenzi babo, bijyanye n’igihe bagiriyeho nabo bari batanzwe n’iri huriro.

 

497 total views, 3 views today

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.