umu amakuru- Hilltop Hotel yafashwe yiba amazi icibwa miliyoni 3Frw z’amande | Umusingi

Hilltop Hotel yafashwe yiba amazi icibwa miliyoni 3Frw z’amande

Please enter banners and links.

Ikigo kimenyerewe mu gutanga serivisi za Hoteli n’ubukerarugendo mu Mujyi wa Kigali cya Hilltop and Country Club, cyafatiwe mu cyuho kiba amazi, gihita cyishyura amande ya miliyoni 3Frw mu gihe hagikorwa iperereza rigamije kureba ingano y’ayo kibye ngo na yo kiyishyuzwe.

Ubutumwa Ikigo cy’Igihugu gishinzwe Amazi, isuku n’isukura (WASAC) cyashyize kuri Twitter kuri uyu wa 8 Gashyantare 2020 buvuga ko Hilltop and Country Club yafashwe yiba amazi kandi ko ari icyaha gihanwa n’amategeko y’u Rwanda.

Bugira buti “Kwiba amazi birahanirwa, usibye gutanga amande, no kwishyura amazi yibwe, icyi cyaha gishobora no gutuma uwabikoze akatirwa ibihano birimo n’igifungo. Hilltop Hotel and Country Club yaciwe amande yo kwiba amazi.”

Amakuru IGIHE yahawe na WASAC avuga ko iki kigo cyafashwe ku wa 6 Gashyantare kiba amazi ku makuru yatanzwe n’abari bamaze igihe babona ko gifite uburyo kivoma amazi ataragera muri mubazi.

Gusa ubuyobozi bw’iyi hoteli busobanura ko nubwo bwemeye kwishyura amande butemera ko amazi yibwe.

WASAC isobanura ko mu gihe umufatabuguzi afashwe yiba amazi ategekwa kwishyura amande ya miliyoni 3Frw kugira ngo adafungirwa burundu amazi mu gihe hagikorwa iperereza, yakwanga kuyishyura rigakorwa yafunzwe.

Nyuma yo kwishyura amande, Urwego rw’Igihugu rw’Ubugenzacyaha rwakomeje iperereza rigamije kureba ingano y’amazi yibwe n’abantu babigizemo uruhare.

Iyo hamaze kugaragara ingano y’amazi yibwe hagendewe ku gihe gishize ayiba, ahita ategekwa kuyishyura, ababigizemo uruhare na bo bamara kuboneka bagashyikirizwa ubutabera ku cyaba cyo kwiba.

WASAC ivuga ko umuntu wibye amazi ahanwa hashingiye ku ngingo ihana icyaha cy’ubujura mu gitabo cy’amategeko ahana ibyaha mu Rwanda.

Iyi ngingo ya 168 ivuga ko kwiba hakoreshejwe kiboko cyangwa ibikangisho bihanishwa igifungo kitari munsi y’imyaka itanu ariko kitarenze imyaka irindwi n’ihazabu y’amafaranga y’u Rwanda, atari munsi ya miliyoni eshatu ariko atarenze miliyoni eshanu.

Source/igihe.com

452 total views, 5 views today

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.