umu amakuru- Ange Kagame hari ibyo yavuze ku mugabo we umunsi w’ubukwe bwabo naho basezeraniye mu rusengero hamenyekanye (Amafoto) | Umusingi

Ange Kagame hari ibyo yavuze ku mugabo we umunsi w’ubukwe bwabo naho basezeraniye mu rusengero hamenyekanye (Amafoto)

Please enter banners and links.

Ange Ingabire Kagame, ubuheta bwa Perezida Kagame na Madamu Jeannette Kagame, ku wa Gatandatu w’icyumweru gishize yashyingiranywe akaramata na Bertrand Ndengeyingoma mu birori by’imbonekarimwe byari bibereye ijisho.

Ubukwe bwa Ange Kagame na Ndengeyingoma bwari bumaze igihe bwitegurwa ndetse na Perezida Kagame yari aherutse kuvuga ko Nyakanga ya 2019 ari ukwezi kw’ibirori bikomeye kuri we kuko aribwo u Rwanda rwizihizamo isabukuru y’imyaka 25 rwibohoye ndetse ari nako umukobwa we azashyingirwamo.

Umunsi nyir’izina w’amateka y’isezerano ryo gushyingirwa imbere y’Imana hagati ya Ange na Bertrand wabaye ku wa Gatandatu tariki ya 6 Nyakanga mu birori byitabiriwe n’abantu bo mu miryango n’abandi batumirwa.

Gusezerana imbere y’Imana byakorewe ku Kimihurura muri IFAK saa yine z’igitondo, bombi bahamya isezerano bijyanye n’ukwemera Gatolika kwa Gikirisitu.

Nyuma y’uwo muhango, hakurikiyeho kwiyakira aho abatumirwa bose berekeje i Rusororo mu Intare Conference Arena ahagana saa munani z’igicamunsi.

Ibi birori by’imbonekarimwe mu buzima bwa Ange na Bertrand byarakomeje kuko nyuma yo kuva i Rusororo habaye umugoroba w’umusangiro, wabereye muri Kigali Convention Centre, ukurikirwa n’ibirori byo kwishimira urugo rushya rw’abageni no gusabana nabyo byabereye mu cyumba cya KCC.

Nyuma y’ibi birori bitangira urugendo rushya rw’aba bombi nk’umugore n’umugabo, Ange Kagame yasangije abantu barenga ibihumbi 173 bamukurikira ku rubuga nkoranyambaga rwa Twitter, ibyishimo bye, avuga ku rukundo akunda Bertrand.

Yifashishije umurongo wo muri Bibiliya mu ndirimbo za Salomo (Indirimbo ihebuje) maze agira ati “ Nabonye uwo umutima wanjye ukunda”; ayo magambo ayaherekesha ifoto nziza ari kumwe n’umugabo we ku munsi w’ubukwe.

Mu mpera za Ukuboza 2018, nibwo Ange Kagame yari yasabwe na Bertrand Ndengeyingoma mu birori bijyanye n’umuco nyarwanda byabereye mu rugo rwa Perezida Kagame mu Karere ka Rwamagana mu Murenge wa Muhazi.

Nyuma y’ibi birori, Ange Kagame icyo gihe nabwo yifashishije urukuta rwe rwa Twitter asangiza abamukurikira akari ku mutima we. Ati “Ku rukundo rw’ubuzima bwanjye, niteguye gukomeza ubuzima ndi kumwe nawe. Twembi, ubuziraherezo.”

Ange Kagame yashimiye kandi ababyeyi be bamureze kugeza akuze ndetse na basaza be batatu; Ivan Cyomoro Kagame, Brian Kagame na Ian Kagame; kimwe n’urungano rwe rwamubaye hafi kuri uyu munsi w’ibyishimo.

Mu mpera z’ukwezi gushize ubwo Perezida Kagame yavugaga ku bukwe bw’umukobwa we, yavuze ko ari “umugisha” mu muryango.

 

3,137 total views, 5 views today

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.