umu amakuru- Col. Byabagamba yavuze ko amaze imyaka irenga itatu akorerwa iyicarubozo muri gereza | Umusingi

Col. Byabagamba yavuze ko amaze imyaka irenga itatu akorerwa iyicarubozo muri gereza

Please enter banners and links.

Kuri uyu munsi ubwo Col. Byabagamba na bagenzi be, Rtd. Brig. Gen Frank Rusagara  na Kabayiza Francois bagezwaga mu rukiko rw’ubujurire rwa gisirikare, umwunganira mu mategeko yatangaje ko umukiriya we afungiye mu kato bityo ko iryo yicarubozo nta bundi buryo ryahagarara atari ukumufungura by’agateganyo.

Mu mwaka wa 2016, nibwo Urukiko Rukuru rwa Gisirikare rwakatiye Col Byabagamba gufungwa imyaka 21 no kwamburwa impeta zose za gisirikare, bagenzi be, Rtd Brig Gen Frank Rusagara na we ahamwa n’ibyaha byose yashinjwaga ahanishwa gufungwa imyaka 20 mu gihe Demob Sgt Kabayiza Francois we yahanishijwe igifungo cy’imyaka itanu n’ihazabu y’ibihumbi 500.

Col Tom Byabagamba muri uyu mwaka wa 2016, yahamijwe icyaha cyo gukwiza nkana ibihuha agomesha rubanda, arwangisha ubutegetsi, icyaha cyo gusebya leta; icyaha cyo guhisha nkana ibintu byagombye gufasha kugenza icyaha gikomeye hamwe n’icyaha cyo gusuzugura ibendera ry’igihugu cyangwa ibimenyetso biranga ubwigenge.

Brig. Gen Frank Rusagara n’umwunganira mu mategeko 

Kabayiza Francois

Col. Tom Byabagamba

Col. Tom Byabagamba wagejejwe mu rukiko kuri uyu wa Gatatu tariki ya 22 Gicurasi 2019,  yambaye impuzankano ya gisirikare mu gihe bagenzi be bari bambaye umwambaro w’icyatsi, yunganiwe na Me Gakunzi Vallerie, wanamusabiye kuba yafungurwa by’agateganyo.

Ashingiye ku ngingo ya 105, yo mu gitabo cy’amategeko y’imiburanishirize y’imanza nshinjabyaha, Me Gakunzi Vallerie yasabye ko umukiriya we afungurwa by’agateganyo, ko iyi ngingo iteganya ko bishobora gusabwa aho iburanisha ryaba rigeze hose.

Aha niho Me Gakunzi yahereye agaragaza ko ubusabe bwe bushingiye ku kuba umukiriya we [Col Byabagamba] ngo agiye kumara imyaka itatu afungiwe mu kato.

Yavuze ko Col Byabagamba afungiye mu kato, aho atemerewe kugira uwo kuvugana nawe kandi ngo urukiko rutarigeze rubitegeka. Me Gakunzi yavuze ko iri yicarubozo nta kindi cyarihagarika kitari ugufungurwa by’agateganyo kw’umukiriya we.

Col Byabagamba ubwo yahabwaga umwanya, yunze mu rya Me Gakunzi, asaba gufungurwa by’agateganyo, ko igihe amaze afungiye mu kato byagize ingaruka ku buzima bwe.

Yavuze ko nk’uko abahanga babivuze ko ‘gushyirwa mu kato bigira ingaruka ziruta izo kunywa itabi’ na we ngo byamugizeho ingaruka, ku buryo ubu ngo arwaye umugongo, akaba asabwa gukora imyitozo ngororamubiri.

Umushinjacyaha yavuze ko abajuriye [Byabagamba, Rusagara na Kabayiza] batigeze bagaragaza impamvu z’ubujurire, ko kuvuga ko ujuriye ntugaragaze icyo ujuririye bidahagije.

Umushinjacyaha yababwiye ko niba batari biteguye guhita batanga impamvu z’ubujurire, bagombaga kuzitanga mu gihe cy’ukwezi, ibintu batishimiye na gato, bavuga ko ‘Impamvu bayitanze bagaragaza ko batemeye imyanzuro y’urukiko’.

Me Gakunzi yasabye urukiko kudaha agaciro iyi mpamvu yatanzwe n’ubushinjacyaha buvuga ko ubujurire bw’umukiriya we bwataye agaciro.

 

 

1,437 total views, 1 views today

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.