umu amakuru- Nyina wa Diane Rwigara yabwiye urukiko ko afite intege nke, adashobora kuburana n’izindi mbogamizi afite zikomeye | Umusingi

Nyina wa Diane Rwigara yabwiye urukiko ko afite intege nke, adashobora kuburana n’izindi mbogamizi afite zikomeye

Please enter banners and links.

Uyu munsi Kuwa kane tariki 16 Ugushyingo 2017 Mukangemanyi Adeline Rwigara yitabye Urukiko Rukuru, avuga ko kubera uburwayi amaranye iminsi, adashobora kuburana kuko ngo afite intege nke.

Mukangemanyi n’umukobwa we Nshimiyimana Diane Rwigara bari kuburana mu bujurire ku cyaha cyo guteza imvururu cyangwa imidugararo muri rubanda bakurikiranyweho bombi, Mukangemanyi akiharira icyaha akekwaho cy’ivangura n’amacakubiri, naho Diane akiharira icyaha cyo gukora no gukoresha impapuro mpimbano.

Uyu mubyeyi utari mu iburanisha riherutse kubera uburwayi bigatuma rinasubikwa, kuri uyu wa Kane yitabye, ariko avuga ko akirwaye ku buryo yemerewe kugira icyo avuga mu rukiko yicaye, mu gihe yagombaga kuvuga ahagaze.

Yavuze ko ari ku miti ikomeye ya ‘antibiotique’, kubera uburwayi yagize guhera ubwo yatangiraga kwitaba mu bugenzacyaha, ntanabashe kuvuzwa ku gihe.

Uburwayi yagize ngo bwagiye bwiyongera kuko aho afungiwe nta mwuka uhagije abona, ndetse ngo ntabasha kubona amazi ashyushye yo kwikanda nk’uko yabitegetswe na muganga.

Yavuze ko ejo yari kwa muganga, ku buryo afite intege nke bituma atabasha kwiregura ku byaha aregwa.

Diane Rwigara azanywe kwitaba urukiko

Me Gashabana yavuze ko bagejeje ku rukiko ibyangombwa bya muganga byakozwe ku wa 2 Ugushyingo, bigaragaza ko arwaye (Certificat medical administrative) ku buryo kuva icyo gihe uwo yunganira ahora kwa muganga, ariko ngo ntafite uburyo agera ku byangombwa bimufasha gukira.

Me Gashabana yanavuze ko Mukangemanyi ahura na muganga hari abantu benshi, ibyangombwa muganga yanditse kigatwarwa n’abandi bantu, ku buryo atabasha kubwira muganga ikibazo afite yisanzuye.

Yasabye urukiko ko rutegeka ko ahabwa uburenganzira bwo kuvurwa uko bikwiye, kandi ibyangombwa byose bya muganga akabihabwa mu ibanga ry’umurwayi hatabaye undi muntu hagati, maze bazabishyikiriza urukiko berekana neza uburwayi bwe.

Me Gashabana yanavuze ko bashyize imyanzuro yabo muri ’system’ ariko ntibabonemo iy’ubushinjacyaha, bagasaba ko Ubushinjacyaha butegekwa kubagezaho imyanzuro yabwo kuko bataburana batabona imyanzuro yabwo.

Mukangemanyi yavuze ko impamvu asaba dosiye yandikirwa na muganga, ari uko atamenya ibyo muganga amwandikira kuko byandikwa bigatwarwa n’abakozi ba gereza.

Diane Rwigara we yavuze ko yiteguye kuburana ariko atigeze abona imyanzuro y’ubushinjacyaha muri ‘system’.

Me Buhuru nawe yavuze ko batanze imyanzuro yabo ariko bari bakeneye kubona imyanzuro y’ubushinjacyaha bakareba niba nta yindi bakeneye kongeraho, asaba ko bayihabwa bakayireba, urubanza rukabona kuburanishwa.

Mu gihe ngo batanze imyanzuro yabo banenga umwanzuro bafatiwe n’urukiko, ngo bagombaga kumenya icyo Ubushinjacyaha bubivugaho, kugira ngo bazabashe kuburana impande zombi zibona aho zihera. Bitabaye ibyo ngo kereka baburanye Ubushinjacyaha nta jambo buhabwa.

Umushinjacyaha Nkusi Faustin yavuze ko Mukangemanyi nta cyemezo cya muganga agaragaza ko arwaye, ahubwo icyo umwunganizi we agaragaza ni ’uko yagiye kwa Muganga ku itariki 7 Ugushyingo none “uyu munsi ni 16.”

Igikenewe ngo ni icyemezo cya muganga cyerekana ko Mukangemanyi afite ikiruhuko cy’uburwayi, ariko ngo ntacyo agaragaza, bityo ngo icyemezo agaragaza nticyahabwa agaciro kuko ntikigaragaza indwara arwaye cyangwa kuba adashobora kuburana.

Kuba ngo atitwarira dosiye kwa muganga, ngo ntibyahabwa agaciro kuko yivuza avugana na muganga, ku buryo atamuha ikiruhuko ngo ntabimenye.

Yavuze ko ku kijyanye n’imyanzuro y’ubushinjacyaha, Abunganira abaregwa bagaragaje ko batabonye, Ubushinjacyaha bwavuze ko bwabonye iy’abaregwa ku wa 3 Ugushyingo bakayisubiza ku wa 6 Ugushyingo , ku buryo batarayibonye byaba ari ubushake buke, ku buryo impamvu zabo zitahabwa agaciro.

Me Gashabana yavuze ko uwo yunganira arwaye kuko buri minsi ibiri ajya kwa muganga, bityo kuba agaragaza ko adashobora kuburana, ubushinjacyaha bwagira impuhwe ku burwayi bwe.

Ubushinjacyaha bwabajijwe niba baba batarohereje nabi imyanzuro yabwo ntigere ku bo igenewe ariko Umushinjacyaha Nkusi Faustin avuga ko internet yagize ikibazo atari kubireba neza.

Umushinjacyaha yavuze ko kuba imyanzuro yarageze ku rukiko ari ikigaragaza ko yashyizwe muri system, ahubwo yibaza niba Abunganira abaregwa batabona ibiri muri system byose. Yatesheje agaciro inyandiko yavugwaga ko igaragaza ko Mukangemanyi arwaye, ndetse ngo uburyo afunzwe si bwo butumye arwara kuko n’abadafunze bivuza.

Urukiko rufashe umwanya ngo rusuzume ibivugwa n’impande zombi

 

 

545 total views, 1 views today

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.