umu amakuru- Abahoze biga G.S.Gahini basuye uwari umuyobozi w’ishuri bamushimira ko yababereye umubyeyi mwiza | Umusingi

Abahoze biga G.S.Gahini basuye uwari umuyobozi w’ishuri bamushimira ko yababereye umubyeyi mwiza

Views:
456

Kuwa 3 Nyakanga 2017 wari umunsi w’amateka ku bahoze ari abanyeshuri mu kigo cy’amashuri cya Gahini (Groupe Scolaire de Gahini)ndetse n’uwahoze ari umuyobozi w’icyo kigo Dr.Everiste Karangwa.

Abahoze biga kuri icyo kigo nyuma yo kurangiza amashuri ubu bakaba ari abakozi abandi ari abayobozi bakomeye mu gihugu bagize igitekerezo cyo guhura bakajya gushimira uwahoze ari umuyobozi w’icyo kigo.

Impamvu zatumye bamusura ndetse bakamuha n’impano harimo ko basanze kuba ari abayobozi abandi nabo mu byo bakora bitandukanye kugirango babigereho ari uburere bwiza yabahaye.

Bamwe bamushimiye uburyo yabacyahaga nk’umubyeyi icyo gihe bagakeka ko ari ukubanga ariko nyuma yo kuba abagabo abandi bakaba abagore basanze Dr.Karangwa Evariste kubacyaha kwe no kubaha ibihano bitari urwango ahubwo yabahaga inzira yo kuba abagabo n’abagore babereye u Rwanda aribyo bashingiyeho bamushimira.

Bahuriye mu rugo rwe Kibagabaga byari ibyishimo bikomeye aho kuramukanya konyine byatwaye amasaha agera kuri 2 baseka basubira mu mateka ya Gahini ku buryo abenshi wasangaga bavuga ko umwanya wabaye muto hakwiye gushaka umwanya uhagije bagashaka ahantu hanini hisanzuye bakaganira,bakabyina ,bakarya bakanywa bashirana urukumbuzi bakiga n’uburyo bakora imishinga ibyara inyungu ndetse no gukora imishinga iteza imbere ikigo cya Gahini aho bize ndetse bavuga ko ariho habahaye kuba abo aribo iki gihe.

Iyo n’impano yagenewe Dr.Karangwa Evariste

Dr.Karangwa aba ikaze iwe mu rugo

Dr.Karangwa Evariste

Bamwe muri bo n’abaganga ,abandi n’abayobozi muri za Bank zitandukanye ,abandi n’abanyamakuru n’abayobozi b’ibinyamakuru ,abandi n’abarimu ,abandi n’abanyapolitike ,abandi n’abasirikare n’abapolisi bakuru n’abandi bikorera ku giti cyabo bose bakaba bahurije hamwe bashimira Dr.Karangwa Evariste.

Umwe mu bari bitabiriye umuhango wo gusura Dr.Karangwa Evariste ndetse nawe wize I Gahini witwa Hategekimana Franscois  Xavier yagize ati “ni ukuri watubereye umubyeyi mwiza cyane ndibuka icyo gihe ntibyari byoroshye nibwo Jenoside yakorewe Abatutsi yari ikirangira turi mu gahinda ko kubura ababyeyi bacu ariko warahatubereye utubera umubyeyi mwiza warakoze cyane”.

Undi witwa Sekanyange Jean Leonald ubu uyobora PSF icyo gihe yari Duwaye (Head Boy)akaba yafashe ijambo ati “Dr.Karangwa n’umubyeyi mwiza tutabona uko tumuvuga kuko ibihe yatuyoboye yatubereye umubyeyi mwiza kuko yatuyoboye mu gihe gikomeye kuko hari ingengabitekerezo ya Jenoside n’ivangura ariko nk’umubyeyi yatuyoboye neza ibyo byose ntibyigeze bihaba I Gahini.Yari umurezi mwiza ufite icyo ashaka ko abana be bagira icyerekezo none twarakibonye niyo mpamvu natwe gtwafashe akanya ko kuza kumubwira ko ibyo yadukoreye byagize umusaruro”.

Dr.Karangwa Evariste yicaranye n’abanyeshuri ku kigo

Mbabazi Mathias na Tuganishuri

Iyo babaga baje gutangira ishuri

Dr.Karangwa Evariste mu ijambo rye yagaragaje ibyishimo byinshi ati “ni ukuri sinzi ukuntu nabashimira ariko njye n’umuryango wanjye turabashimiye cyane tubikuye ku mutima kuba mwaragize iki gitekerezo mukaza kubitugaragariza mwakoze cyane abaje n’abatabashije kuza”.

Dr.Karangwa yakomeje ababwira ko nk’umurezi cyangwa umubyeyi yakoze inshingano ze uko bikwiye kuko hari imyaka abana bageramo utabacyaha bakaba bashobora kwangirika bigatuma babaho nabi mu buzima bwabo ati niyo mpamvu nagombaga rimwe na rimwe ku bacyaha bya kibyeyi ntago byari ukubanga ahubwo nashakaga ko muzagira icyo mwimarira.

Yakomeje ababwira ati ibyo mwashakaga cya gihe ,abashakaga gutoroka kujya kunywa akayoga bakabura uko bajya kukanywa ubu hano karahari kenshi mukanywe mugahage n’abashakaga kujya Shahuri ibyo mwashakaga ubu nta wabibabuza mwisanzure mwumve ko hano ari mu rugo kandi mujye mugaruka tuganire twungarane ibitekerezo.Yasoje avuga ati tugiye kujya mu matora dukwiye kwitonda tugatora neza kuko hari abashuka abantu ati umuntu ashimwa ni uwo ukorera umuntu wo hanze ntacyo yakumarira dukomeze duteze imbere igihugu cyacu.

N’ubwo umwanya wari muto abantu ari benshi wasangaga buri umwe ashaka kugira ijambo avuga ariko ntibyakunda ariko ku bagize amahirwe yo gufata mikoro wasangaga basubira ku mateka bagiriye I Gahini ariko ayo mateka bakavuga ko yabaganishaga ku iterambere bitewe n’uburere bwiza bahawe na Dr.Karangwa.

Kantegwa Odeth wari Head Girl yagize ati “njye Dr.Karangwa yangize Head girl ku ngufu ntabishaka ariko icyo nabonye nyuma kandi cyamfashije mu buzima ni uko yari yambonyemo Leadership kandi n’ubwo ntabishakaga ariko narabishoboye kandi byaramfashije mu buzima bwanjye kubera we”.

Ibyahavugiwe byari byinshi cyane gusa icyo umuntu yavuga muri rusange ni uko Dr.Karangwa yabaye umurezi mwiza ,aba umubyeyi mwiza kandi akaba yashimishijwe no kubona abantu atatekerezaga ko bashobora kumuzirikana bamushimira ko yababereye umubyeyi mwiza dore ko hashize imyaka hafi 20 ndetse n’ababishoboye kujyayo bishimye cyane abandi nabo bababajwe no kutaboneka kubera inshingano bari bafite zitandukanye  abandi nabo bari mu mahanga.

Gatera Stanley

About author

Related Articles

3 Comments

  1. Dr KARANGWA Evariste July 6, 2017 at 9:23 am

    Nyakayonga ka Musare was Karimunda wo mu Bbanukamishyo yabwiye MUTARA II RWOGERA, ati: Ukwibyara bitera Ababyeyi Ineza.

    Nuko nuko Umusingi.

    • Dr KARANGWA Evariste July 6, 2017 at 9:29 am

      Nibyo Nyakayonga ka Musare was Karimunda wo mu Bbanukamishyo yabwiye MUTARA II RWOGERA, ati Ukwibyara bitera Ababyeyi Ineza.

      Mwarakoze rwose

  2. BAZIRUWIHA Jean Claude July 7, 2017 at 5:32 pm

    Dr. Karangwa yakoze ibikorwa byinshi bitandukanye. Turamushimira cyane we na Madame we.

    Ni we watangije uburezi bw’abanyeshuri bafite ubumuga bwo kutabona mu Rwanda muri Secondary na University.

    Turabyibyka mu mwaka wa 1997 nibwo abanyeshuri ba mbere bafite ubumuga bwo kutabona yabazanye muri Groupe Scolaire de Gahini. Abo banyeshuri baracyahiga.

    Mu kwezi kwa gatandatu gushize Madame KARANGWA yaje no gusura abo banyeshuri.

    Urukundo Dr.KARANGAWA afite yarusangije n’abanyeshuri bose yareze ku buryo wasangaga bafasha mu myigire abanyeshuri bafite ubumuga bwo kutabona.

    Abanyeshuri twese twize muri G.S. GAHINI turamushimira cyane.

    We wish him success, blessings from God, peace, prosperity, joy and happiness.

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.