umu amakuru- Opinion:Abantu bagiye gushakana bagiye babana bagakora ubukwe nyuma ntihari icyo byahindura mu gukemura ibibazo byinshi biri mu miryango byo gutana no gushwana?(Vidio) | Umusingi

Opinion:Abantu bagiye gushakana bagiye babana bagakora ubukwe nyuma ntihari icyo byahindura mu gukemura ibibazo byinshi biri mu miryango byo gutana no gushwana?(Vidio)

Views:
102



Imiryango muri iyi minsi ifite ibibazo byinshi byo gutandukana nabi biturutse ku makimbirane atandukanye amwe aterwa n’abagabo andi agaterwa n’abagore ariko hari abantu maze iminsi numva bashaka gutangiza ikintu cyo kuvuga ngo nti byashoboka ko abantu babana bakabimenyesha ababyeyi bakazakora ubukwe nyuma?.

Hari abavuga ko bishobora kugira icyo bikemura kubera hatakiba Abaranga usanga umuntu ahuye n’undi mu bukwe ,mu modoka ,mu nzira ,kuri Facebook cyangwa ibyo bita pass aho umuntu aguha nimero y’umuntu ngo wirwarize bakaba barakundanye igihe gito kubera umusore yumva akeneye gushaka umugore ati n’uyu nta wundi cyangwa n’umukobwa amaze gukundana n’abasore benshi yageze aho arambirwa ati reka mpfe kujyana nawe bagahita bapanga ubukwe ako kanya nta ubanje kumenya undi bihagije.

Hari abandi bashakana bagakora ubukwe umukobwa ataranajya iwabo w’umusore cyangwa umusore atarajya iwabo w’umukobwa kandi njya n’umva hari abafatira abandi bihano ngo bishe umuco nk’ibaza uyu muco wo kuki utigishwa abantu bakamenya ko umusore agomba gukora ibyo bita kurambagiza.

Barbie Kyagulanyi na Bobi Wine Kyagulanyi umunsi w’ubukwe

Judith Babirye n’umuhanzi w’indirimbo zihimbaza Imana uherutse gukora ubukwe

 

Akajya ku ivuko ry’iwabo w’umukobwa akamenya imyitwarire kuko n’ubwo babisuzugura ariko byange bikunde bifite uruhare runini mu mibanire y’umugabo n’umugore kuko wamaze kumenya ko uwo muntu agira amahane yaba umugabo cyangwa umugore muzabana watangira kugira impungenge uti none uyu muntu numvise ibyo ko bitoroshye tuzashobokana ukanagisha inama abakuru icyo gihe ufata umwanzuro n’abakuru bakagushyigikira bati umwana ibimubayeho yarabitubwiye bakakujya inyuma bakagushyigikira ariko ubu murashwana mukageza ubwo buri umwe afata icyumba cye n’ababyeyi batabizi.Mu bihugu byateye imbere cyane cyane I Burayi mbona abahanzi cyangwa abakinnyi b’umupira w’amaguru babana n’abagore babo bakazakora ubukwe bafitanye abana nk’ababiri cyangwa batatu ,uretse n’Iburayi na Uganda ,Kenya birahaba Chamilion n’umuhanzi ukomeye muri Uganda ,Bobi Wine n’umuhanzi ukomeye akaba n’umudepite ariko bashatse abagore babo bafitanye abana kandi bakoze ubukwe bwiza .Ntago mvuga ku bahanzi gusa n’abantu basanzwe mbibona kuri za Televiziyo ubona abantu bakuru bakora ubukwe n’abana babo ari bakuru babambariye nkatekereza ko abo bantu bashaka kuzana icyo gitekerezo bashobora kuba bafite ukuri .

Icyo gitekerezo njye nagishyigikira kuko numva byafasha abantu kumenyana bihagije kandi bakaba bazi ko hari ideni bafite ryo kuzereka ababyeyi ibirori by’ubukwe ndetse n’inshuti n’abavandimwe bakabutaha.

Uzarebe iyo ufite ideni uhora uritekerezaho ushakisha uburyo waryishyura n’ibi bije numva icya mbere byafasha kwiyubaka vuba kuko umusore arakora yagwiza Miliyoni 4 cyangwa 3 ati ngiye gukora ubukwe ariko ufite izo Miliyoni 4 n’umukobwa akazana izindi cyangwa akazana 2 mukaziteranya mwagura inzu mukabanza kuva mu bukode aho gukora ubukwe agashira mugasigara murwana no kubona ayo kwishyura ubukode no kubaho kandi ayo mwakoresheje ubukwe yari kuba Umusingi mwiza wo gutangira ubuzima.

Erega ibintu rimwe na rimwe bisaba gushyiramo imibare kugirango urebe ejo hazaza kandi bikajyana n’imyumvire y’abantu kuko nzi neza ko ibi mbabwira mubyumvise ejo abantu bagatangira kubyigisha abantu bakabyumva bazasanga ari byiza cyane kurusha ibi bakora .

Ababyeyi nabo bakwiye ku bitekerezaho kuko gushyingira umwana wawe ugasigara nta garanti ufite ejo cyangwa ejobundi ukumva ngo urugo rwamunaniye mwabagira inama kandi mukumva ko babanye kubwumvikane bakabibamenyesha ko bazakora gahunda y’ubukwe nyuma ayo bagakoresheje ubukwe agiye kubafasha gutangira ubuzima bameze neza byaba atari bibi.

Hari abatari bubyumve bumva ko ari agasuzuguro gutwara umwana w’abandi ku buntu ariko nibatekereza neza bazasanga ibi aribyo byaramba kurusha ibi bikorwa kuko abenshi ahanini bashwana bazira ubukene n’ingeso nakwita mbi gutukana ,kutubahana n’izindi zirimo kubwira mugenzi wawe amagambo amukomeretsa ariko habayeho kurambagiza cyangwa bitashoboka hakabaho kumvikana ubukwe bukajya bukorwa nyuma amafaranga mukayakoresha mu mishimga yo kubafasha kubaho neza n’abana banyu ,bakiga neza ,bakarya neza byaba ari byiza.

Icyo cyari igitekerezo numvise mu bantu nifuza kugisangiza abakunzi b’Ikinyamakuru cyanyu mukunda cyane Umusingi kugirango bidufashe kuganira kubyatwubaka cyangwa byubaka igihugu cyacu.

Ushobora kubyumva ukundi n’uburenganzira bwawe icyangombwa ni uko twubahana buri umwe tukubaha ibitekerezo bye hanyuma binyuze mu biganiro nibwo umwe yumva igitekerezo cy’undi atari afite akumva kimufashije kumva ibintu atari azi ashobora gukora bikaba byahindura ubuzima bwe cyangwa bw’abandi abana nabo bagatera imbere ,uwo niwo musaruro tuba dushaka.Ushobora kunyandikira kuri Email yanjye stanleygatera@gmail.com nawe ukampa igitekerezo cyawe tukagisangiza abandi binyuze mu kinyamakuru Umusingi mukunda muri benshi .

Gatera Stanley 0783664450

 

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.