umu amakuru- Rubavu :Uzamushaka Providance wari mu rubanza na Gitifu wa Rugerero na Ilidephonse n’uwitwa Jules yaburiwe irengero | Umusingi

Rubavu :Uzamushaka Providance wari mu rubanza na Gitifu wa Rugerero na Ilidephonse n’uwitwa Jules yaburiwe irengero

Views:
429

Kuri uyu wa 18 Ukwakira 2018 bamwe mu baturage mu Karere ka Rubavu batangarije Ikinyamakuru Umusingi ko bumvise amakuru mu nzego ko umukobwa witwa Uzamushaka Providance wari mu manza na Gitifu w’Umurenge wa Rugerero Uwajeneza Jeanette na Nzabonimpa Ilidephonse bapfa amafaranga n’imitungo.

Ikinyamakuru Umusingi kimaze kumenya amakuru ko Uzamushaka Providance yaburiwe irengero cyangwa ashobora kuba yarashimuswe twagerageje kubaza inzego z’ibanze mu Murenge wa Rubavu aho yari atuye maze Gitifu w’uwo Murenge witwa Mugisha Honore ati “Ayo makuru ntayo nzi nigeze kumva afite ibibazo mu Murenge wa Rugerero mwababaza ariko njye simuzi”.

Uzamushaka akaba yari atuye ahitwa  Kantembwe nyuma yo kujya aba ahantu hatandukanye kubera ibibazo yahuye nabyo agakurwa mu mitungo yari imwanditseho ariko ku bindi byangombwa by’imitungo handitseho Succision Ntawumenyamunsi Marc na Nyarabashyitsi bitabye Imana bamwe abana babo bakaba bibera mu bihugu bitandukanye I Burayi na Amerika ndetse bamwe bakaba bashinjwa ibyaha bya Jenoside yakorewe Abatutsi.

Umuvunyi Mukuru Anastase  Murekezi ibumoso na Nzabonimpa Ilidephonse na Uzamushaka Providance uvugwa ko yaburiwe irengero

Uuzamushaka Providance

Uzamushaka Providance twagerageje kumuhamagara kuri Telephone ye igendanwa ariko itanyuramo.

Uzamushaka akaba yaraburanaga n’uwitwa Nzabonimpa Ilidephonse waguze ikibanza na Uzamushaka nyuma Abashinwa bubaka umuhanda nabo bagashaka kugura na Nzabonimpa Ilidephonse aribwo hazaga uwitwa Jules akavuga ko yahawe uburenganzira bwo gucunga imitungu ya Ntawumenyamunsi Marc na Nyarabashyitsi bityo Abashinwa amafaranga bayaha Umurenge wa Rugerero uyobowe na Uwajeneza Jeanette bityo batangira kujya mu manza uko ari 4.

Nzabonimpa Ilidephonse waguze na Uzamushaka ati naguze mu buryo bwemewe n’amategeko ngomba kubona amafaranga yanjye ,Uzamushaka Providance ati amafaranga naya Nzabonimpa Ilidephonse naho Jules na Gitifu Uwajeneza Jeanette amafaranga barayimana kugeza ubwo bigiye mu Nkiko kugeza n’uyu munsi.

Iki kibazo cyarakomeye kimaze kuzenguruka Inkiko zose za Rubavu na Musanze bituma Umuvunyi mukuru Murekezi Anastse ajya kugikemurira mu ruhame I Rubavu ategeka ko imwe mu mitungo ihabwa Uzamushaka Providance akabona aho aba ndetse akabona n’ikimutunga kuko yakuriye kwa Ntawumenyamunsi Marc na Nyarabashyitsi  agomba guhambwa umurage we bityo indi mitungo igacungwa na Leta kuko hari imitungo bamwe mu bana ba Ntawumenyamunsi Marc na Nyarabashyitsi bangije imitungo muri Jenoside yakorewe Abatutsi bagomba kwishyura.

Amakuru dufite ni uko icyemezo cy’Umuvunyi mukuru kitashyizwe mu bikorwa ahubwo nawe yarezwe mu Rukiko rwisumbuye rwa Nyarugenge rukaba rwaragombaga kuburanishwa kuwa 15 Ukwakira 2018 ariko rukaba rwasubitswe nkuko hari abakurikiranye iby’uru rubanza bashaka kumenya amakuru yarwo badutangarije.

Ikinyamakuru Umusingi uyu munsi Kuwa 18 Ukwakira 2018 twabajije Gitifu wa Rugerero Uwajeneza Jeanette niba hari amakuru ya Providance Uzamushaka yaba azi ati “Nta makuru ye nzi na cyagihe yaburanaga yari atuye mu Murenge wa Rubavu mwabaza abayobozi muri uwo Murenge atuyemo mukumva”.

Amakuru twatangarijwe n’Umuvunyi Mukuru ni uko ngo Kuwa 15 Ukwakira 2018 bakiriye kopi y’urwandiko ruvuga ko Uzamushaka Providance yasabye umuryango we imbabazi ariko urwego rw’Umuvunyi mukuru rukaba rwaragerageje kumushaka ngo bamubaze iby’iyo baruwa baramubura ariko basaba DPC wa Rubavu kubafasha gushakisha Uzamushaka Providance ariko Umuvunyi mukuru Anastese Murekezi akaba avuga ko nta makuru yandi arabona.

Twabibutsa ko Uzamushaka Providance igihe yagmbaga kwitaba muri Perezidansi yafashwe agafungwa na Nzabonimpa umugambi wo kujya muri Perezidansi urapfa ariko Umuvunyi mukuru akaba yari yarategetse ko hatazagira uwongera kubafunga.

Impamvu Uzamushaka n’abandi bavugaga ko uwitwa Jules wavugwaga ko yahawe amafaranga y’Abashinwa ko batamwemeraga ni uko abana ba Ntawumenyamunsi Marc na Nyarabashyitsi  bagombaga kwandika urwandiko bose bakarusinyaho bakarunyuza muri Ambasade y’u Rwanda mu bihugu batuyemo Ambasade zikabasinyira bityo Jules akaba yemewe n’amategeko guhagararira umuryango wa Ntawumenyamunsi Marc na Nyarabashyitsi  ariko wasangaga bamwe baranditse ntibanyuze muri Ambasade abandi bataranditse ngo basinye.

Twagerageje guhamagara Jules kuri Telephone ye igendanwa ariko yanga kutwitaba akaba yari aherutse kutwoherereza ubutumwa bugufi yishimira ko urwego rw’abanyamakuru bigenzura mu Rwanda bahagaritse umunyamakuru w’ikinyamakuru Umusingi ariko tukaba twasakaga kumubaza niba hari amakuru ya Uzamushaka Providance n’urubanza bivugwa ko bareze urwego rw’Umuvunyi uko bimeze ariko ntiyatwitabye.

Nzabonimpa Ilidephonse tumubajije yavuze ko nta makuru ya Uzamushaka afite ati “Mwabaza Jules niwe numvise bamaze iminsi ngo bari kumwe ndetse ngo yamusinyishije inzandiko asaba imbabazi”.

Twagerageje kubaza umuvugizi wa Polisi mu Ntara y’Amajyaruguru ariko ntiyatwitaba ndetse tumwoherereza ubutumwa bugufi ntiyabusubiza.Turacyakoze kubakurikiranira iyi nkuru hagize andi makuru tumenya nayo tuzayabagezaho .

Gatera Stanley

About author

Related Articles

1 Comment

  1. gasore October 19, 2018 at 11:23 am

    mukurikirane muduhe amakuru kd mubigeze nokunzego zibishinzwe bakurikirane.

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.