umu amakuru- Dosiye ya Gen.Kale Kayihura yo kwica Kaweesi yagarutse iteye ubwoba, ivuga uburyo umupangu wapanzwe n’uburyo Kayihura awinjiramo. | Umusingi

Dosiye ya Gen.Kale Kayihura yo kwica Kaweesi yagarutse iteye ubwoba, ivuga uburyo umupangu wapanzwe n’uburyo Kayihura awinjiramo.

Views:
578

Hari hashize iminsi idosiye ya Gen.Kale Kayihura icecetse ariko uyu munsi Ikinyamakuru cyo muri Uganda kitwa Bukedde cyagaruye iyo dosiye kivuga uburyo inzego zishinzwe umutekano zirimo CMI ,ISO na Polisi  n’izindi zasohoye raporo yakozwe ku rupfu rwa Andrew Felix Kaweesi n’uburyo yakozwe ndetse n’uburyo Gen.Kayihura ayinjiramo.

Mu majwi ari muri raporo yakozwe n’inzego zishinzwe umutekano harimo aho Gen.Kale Kayihura abaza umupolisi witwa  Muhangi  ati Kaweesi arapfuye undi aramusubiza ati yee yee Kayihura asubiramu ati kirakozwe urakoze cyane.

Raporo igaragaza abantu 16 bafashwe na ISO ibohereza mu ishami rya National Security Council (NSC)kugirango bashinje Gen.Kale Kayihura mu byo kwica Andrew Felix Kaweesi.

Aba bantu uko ari 16 bose barongeye babazwa na CIM ,ISO na Polisi kane na gatanu ku byo bazi ku rupfu rwa Andrew Felix Kaweesi kugirango bumve ko ibyo bavuga bifite ukuri.

Kaweesi yishwe tariki 17/3/2017 i Kulambiro mu gitondo avuye iwe mu rugo agiye ku kazi ,yicwa ari kumwe n’umushoferi we Godfrey Mambewa n’umupolisi wamurindaga witwaga Kenneth Erau.

Hafashwe abantu benshi bagezwa imbere y’umucamanza Noah Ssajjabbi i Nakawa 8 muribo abohereza mu rukiko rwisumbuye.Tariki 13/6/ 2018 ishami ry’abashinzwe gushaka ibimenyetso batowe na (NSC) bongeye kubaza abashinjwa bose basanga ibyo bavuga bose bishyira Gen.Kale Kayihura mu mupangu wo kwica Kaweesi bategeka ko Kayihura afatwa.

Mu bimenyetso ISO yahaye NSC harimo amajwi bikaba byajyanyweyo na  dayirekita(Director) wa  ISO Col. Frank Kaka Bagyenda amajwi akaba avugwa ko ari aya ACP Herbert Muhangi wayoboraga ishami rya polisi ryitwa Flying Squad yagiranye na Gen.Kale Kayihura.

Uretse iby’amajwi aho Gen.Kale Kayihura abaza Herbert Muhangi ngo Kaweesi arapfuye undi akamusubiramo ngo yee yee ,hari abandi bantu 16 barimo Kiiza Rwogamutyarise uzwi nka  Rasta, Frank Difas Nyindo, Christine Umohooza Mbabazi, Annah Ninsiima, Wilber Kiggundu, Moses Kintu Kavuma, Hope Ainomugisha, Lazio Mugerwa, Difas Kadaala, Nnaalongo Nabawanuka, AIGP Fred Yiga, IP Mary Mbabazi, Col. Grant Mugabi wa SFC, ASP Aggrey Owor, Ahmed Kakonge ne Micheal Mugabi.

KIIZA RWOGAMUTYARIZE (Rasta)

Uzwi nka Rasta w’imyaka 34 muri raporo ya ISO avuga ko mu mwaka wa 2012 hari umugabo witwa Livingstone Ssennyondo waje akamuha umuzigo kuwumujyanira ahantu hitwa Namugongo na Buziga ariko aza kumenya ko uwo muzigo wabaga urimo imbunda dore ko bakundaga kumutuma aza kubimenyesha polisi na CMI ariko ntibagira icyo babikoraho.

Akomeza avuga ko uyu Livingstone Ssennyondo muri 2015  yaje kumwereka Gen.Kale Kayihura bahuriye mu birori ahantu muri Wakiso,Nixon Agasirwe amushyira mu barinda umutekano.

Nyuma Rasta yaje guhamagarwa kwa  Nixon Agasirwe I Kololo amuhuza n’abandi bashinzwe umutekano bakomeye barimo na Muhangi wayoboraga Flying Squad.Bavuye aho nyuma y’iminsi micye baje kongera guhurira Nyondo Pub ku muhanda ujya Ntebe mu nama yarimo  Ndahura Atwoki, Frank Mwesigwa, Muhangi, Jonathan Baroza, Agasirwe, Richard Ndabwoine, Abel Kitagenda, Martin Kimbowa, Fiasal Katende, Abel Tumukunde n’abandi batandukanye mu nama yigaga ku muntu ukomeye muri Leta bashakaga kwica ariko nyuma uwo muntu aho bashakaga kumwicira basanze harimo camera umugambi urapfa.

Ku itariki 10 ukwezi kwa gatatu barongeye baramuhamagara ngo abasange kuri  Indigo Bar i Nakasero aho yasanze aba ba polisi bakomeye nanone yari yahuye nabo mbere kuri Nyondo bamubwira ko misiyo yari ihari yahindutse ubu indi ihari niyo kwica Kaweesi.

Rasta n’undi witwa Kimbowa bahawe misiyo yo gutwara moto bahetsi Abel Tumukunde na Muhangi aribo bagombaga kurasa Andrew Kaweesi ndetse abandi babiri bari bihishe ku ruhande aho bagombaga kwicira Kaweesi kugirango Tumukunde na Muhangi misiyo nibananira bayirangize.

Uyu Rasta ashinja umupolisi witwa Ndahura Atwoki ko yahaye Mbabazi Christine amashilingi kubera akazi yari agiye gukora mu kubafasha mu kwica Kaweesi n’umushoferi we n’uwamurindaga hanyuma we (Mbabazi)bakamuha inzu igeretse gatatu ya Miliyoni Magana atanu (500M)n’imidoka mu mubwoko bwa Toyota Land cruiser.

Saa munani z’ijoro nibwo inama ya nyuma yabaye yo kwica Kaweesi ikaba yarabereye kuri Kati Kati  Lugogo Bypass na Mbabazi yari ayirimo avuye gusenga na Kaweesi nibwo yababwiye ko Kaweesi yabimenye ko hari abantu bashaka kumwica ko yamwumvise asenga mu Kinyarwanda ati hari abantu Mana bashaka kunyica ariko barashaka kunyicira iki?Mbabazi avuye ku musozi gusenga na Kaweesi nibwo yahise ajya munama ababwira ko Kaweesi yabimenye nibwo bahise bava munama iryo joro bajya kwa Kaweesi baramwica.Raporo ivuga ko misiyo yo kwica Kaweesi yagombaga kumara iminota 12 gusa bakaba baratangiye kurasa saa moya na mirongo 40 za mugitondo barangiza saa moya na mirongo itanu n’ibiri.

Barangije kumurasa uwitwa Rasta wari utwaye moto ari nawe uvuga uko byose byapanzwe yagiye gukingura imodoka ya Kaweesi ngo arebe niba yapfuye koko kuko yashoboraga kuba yambaye I jaketi itanyuramo amasasu maze asanga yapfuye koko atwara na Telephone ye na laptop ye.

Mbabazi Christine Umuhoza avuga ko Kaweesi atarapfa hari flash yamuhaye iriho ibintu Gen.Kayihura yakoranaga n’ikindi  gihugu bibi avuga ko aribyo bituma Kayihura ashaka kumwica.Amakuru avuga ko iyo Flash Mbabazi Christine yahuye na Perezida Museveni arayimuha ariyo yabaye nyirabayazana yaviriyeho Kayihura gufungwa. SIMON PETER ODONGO (ISO)

Uyu niwe ukuriye polisi ishinzwe ibya internet ndetse akaba ariwe wakoze akazi ko gushakisha ibijyanye na Telephone zakoreshejwe mu kwica Kaweesi akaba yasanze Telephone zakoreshejwe zose uko ari 7 zarakoreshaga setilite kandi zose zikaba zari Kulambiro mu masaha Kaweesi yishwemo.

Basanze izi Telephone zose zarahamagaranaga kenshi muri ayo masaha ariko nyuma hari indi Telephone itari kuri gahunda idakoresha setilite yahamagaye zimwe muri izo Telephone bakaba bagaragaza ko ari iya Kayihura.

 

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.