umu amakuru- Gasabo: Urubyiruko rwibumbiye mu muryango FPR rurahiga kongeza umuvuduko mu iterambere | Umusingi

Gasabo: Urubyiruko rwibumbiye mu muryango FPR rurahiga kongeza umuvuduko mu iterambere

Views:
38

Urubyiruko rwo mu murenge wa Kinyinya mu midugudu ya Taba, Rusenyi, Binunga na Ngarukiyinka igize akagari ka Murama ruravuga ko rugiye kongera ingufu mu mirimo iganisha ku iterambere bakivana mu bukene banateza imbere igihugu n’abanyarwanda muri rusange.

Ibi babitangarije mu nama rusange bagize kuri iki cyumweru tariki ya 30 Nzeri 2018 mu murenge wa Kinyinya mu kagari ka Murama  aho bari bafite insanganyamatsiko igira iti: uruhare rw’urubyiruko mu kubaka u Rwannda twifuza.”

Iyi nama rusange yari igamije kwishimira igikombe cyahawe urubyiruko rwo mu kagari ka Murama mu tugize uyu murenge kubera kwesa imihigo mu bikorwa basabwaga gukora nk’urubyiruko rushamikiye ku muryango FPR Inkotanyi.

Mu byo uru rubyiruko rwari rwiyemeje gukora bigamije gushyigikira umuryango FPR Inkotanyi byarimo gukomeza kwesa imihigo mu iterambere, byatumye aka kagari ka Murama gahabwa igikombe cy’indashyikirwa kubera ko bahize utundi tugari mu kubishyira mu bikorwa.

Dusangumuhire Sandrine, umuyobozi mukuru w’umuryango AMIGOS wimakaza ubucuti, kwiteza imbere no kuvana abandi mu bwigunge, ni umwe mu rubyiruko rwo mu kagari ka Murama kabaye aka mbere mu gushyira mu bikorwa imihigo bari bihaye.

Yagize ati “Iki gikombe cyahawe urubyiruko rwo mu kagari ka Murama. Icyo twiyemeje gukora nyuma y’iki gikombe ni ugukomeza kwagura ibikorwa biteza imbere igihugu nko kuvana urubyiruko mu biyobyabwenge no kururinda kwishora mu bishuko, tukaruhuriza hamwe dukoresheje amaboko yacu ndetse tugakomeza guteza imbere akagari kacu dufasha imfubyi, twubakira abatishoboye tunateza imbere amakoperative y’urubyiruko.”

Umuryango AMIGOS usanzwe ufasha mu bikorwa bitandukanye birimo kubakira abatishoboye, gufasha abakene bakanakora ibikorwa bibyara inyungu; nko kwakira abantu mu manama ndetse no mu bindi birori.

Ruzigana Olivier  Freelancer

 

 

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.