umu amakuru- Imbabazi za Perezida yahaye Ingabire Victoire na Kizito n’abandi bose hamwe 2140 zatunguranye | Umusingi

Imbabazi za Perezida yahaye Ingabire Victoire na Kizito n’abandi bose hamwe 2140 zatunguranye

Views:
299

Kizito Mihigo na Ingabire Victoire, bari bafungiye muri gereza ya Nyarugenge iherereye i Mageragere, kuri uyu wa Gatandatu tariki 15 Nzeli 2018 bafunguwe nyuma y’imbabazi bahawe na Perezida Kagame zatunguranye.

Ku isaha ya saa 9:47, Kizito Mihigo, yakandagije ikirenge cye hanze ya gereza atambaye umwambaro uranga imfungwa n’abagororwa.

Mihigo yari yambaye umupira w’umweru urimo utubara twa Orange, w’umuryango yashinze ’KMP’ n’ingofero ya Orange, na yo y’uyu muryango. Yambaye isaha ku kuboko kw’ibumoso, ishapure mu ijosi n’indi mirimbo ku kuboko kw’iburyo.

Bidatinze Ingabire Victoire nawe yahise asohoka, yambaye ikanzu y’umutuku, ikote ry’icyatsi, umusatsi w’umwimerere n’isakoshi mu ntoki.

Ingabire avugana n’itangazamakuru asohotse muri gereza

Kizito Mihigo asohotse muri gereza

Nyuma yo gufungurwa Kizito Mihigo yabwiye itangazamakuru ko yishimiye imbabazi yahawe, yongeraho ko  mu kuburana kwe yaburanye ’atakamba’ yemera ibyaha kuko yari azi neza ko Perezida Kagame ari umunyembabazi.

Ingabire Victoire na we yashimiye Umukuru w’Igihugu kuba amufunguye ku mbabazi ze, avuga ko bigaragaza ko aha agaciro abo badahuje ibitekerezo bya politiki.

Inama y’Abaminisitiri idasanzwe yateranye kuri uyu wa Gatanu iyobowe na Perezida wa Repubulika Paul Kagame, yemeje ifungurwa ry’abagororwa 2140 barimo Kizito Mihigo na Victoire Ingabire Umuhoza.

Kuri gereza ya Nyarugenge habanje kurekurwa abagabo, hakurikiraho abagore. Kizito ari mu bandi 447 bahawe imbabazi muri gereza ya Nyarugenge.

Ingabire yari yarakatiwe imyaka 15 n’Urukiko rw’Ikirenga muri 2013, naho Mihigo yari yarakatiwe imyaka 10 n’Urukiko Rukuru muri 2015.

Umwe mu bakurikiranye amakuru y’ifungurwa rya Ingabire Victoire na Kizito Mihigo n’abandi utashatse ko amazina ye atangazwa yagize ati “Aya makuru arashimishije cyane kuba Perezida yabahaye imbabazi ariko akaba yatunguranye”.

 

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.