umu amakuru- Menya impamvu Museveni yarekuye Gen.Kale Kayihura by’agateganyo abinyujije mu rukiko rwa gisirikare | Umusingi

Menya impamvu Museveni yarekuye Gen.Kale Kayihura by’agateganyo abinyujije mu rukiko rwa gisirikare

Uwahoze ari umuyobozi wa Polisi ya Uganda, Gen. Kale Edward Kayihura  kuri uyu wa 28 Kanama 2018 yemerewe kurekurwa n’urukiko rwa gisirikare akajya aburana ari hanze ya gereza.

Amakuru aturuka muri Uganda ni uko hari Abahima babakire bakomoka Mbarara aho na Perezida Museveni akomoka bagiye kwinginga Museveni kugirango arekure Kayihura nkuko bizwi ko Museveni atagira ubugome kandi umuco w’Abahima iyo umuntu akoze ikosa abasaza baraterana bakamusabira imbabazi cyangwa bakamufatira n’ibihano aribyo byakozwe kuri Kayihura.

Ikindi nanone Gen.Kayihura mu myaka irenga 10 yose amaze ayobora polisi yari yarubatse ikintu cyo kugira ibikorwa akorera abaturage bamwe na bamwe ku buryo bamukundaga cyane bakaba barabigaragaje basaba ko umuntu wabo arekurwa bityo Museveni asanga kumufunga bizatuma abaturage bamwanga ariko ubwo yamurekuye aho yajya hose n’ukumushimira ko atafunze umuntu wabo byaba n’amajwi bayamuha agakomeza kuyobora Uganda.

Urukiko rwa Gisirikare ruherereye Makindye mu mujyi wa Kampala rwafashe uyu mwanzuro maze rwemeza ko Kayihura aburana ari hanze nyuma yo gutanga ingwate ifite agaciro ka  miliyoni 10 z’amashilingi ya Uganda naho abamwishingiye aribo Major. Gen. Sam Kavuma na Major Gen. James Mugira basabwa gutanga ingwate ihwanye n’agaciro ka miliyoni  eshanu.

Urukiko ruyobowe na Lt. Gen Andrew Gutti kandi rwasabye Kayihura ko atemerewe kurenga mu turere tw’umujyi wa Kampala na Wakiso keretse abiherewe uburenganzira n’uru rukiko.

Uru rukiko kandi rwasabye ko Kayihura azajya yitaba urukiko buri wa mbere w’icyumweru cya mbere cy’ukwezi n’ikindi gihe yabisabwa n’uru rukiko.

Gen.Kale Kayihura ubwo yrazanywe gusomerwa umwanzuro w’ubusabe bwe bwo kurekurwa akaburana ari hanze ya gereza

Kayihura yasabye urukiko ko rwamureka akajya kwivuza muri Kenya  kandi ko kuburana ari hanze ari uburenganzira ahabwa n’itegekonshinga.

Gen. Gutti yavuze ko ibyaha  Kayihura ashinjwa bikomeye kandi ko bikurura hafi igihano cy’urupfu gusa avuga ko ingingo zavuzwe haruguru zitakwirengagizwa kuko Kayihura ari ubwa mbere aburanishijwe.

Lt.Gen.Gutti yavuze ko Gen.Kale Kayihura atemerewe gusohoka igihugu n’ubwo abamwunganira mu mategeko bamusabiraga ko yemererwa kubera ko arwaye bikomeye ababwira ko ibyo byashoboka abiherewe uburenganzira n’urukiko rwamuburanishije n’igisirikare.

Gen. Kayihura yatawe muri yombi kuwa 13 Kamena 2018 ubwo yari ahitwa Kashagama mu Karere ka Lyantonde aho akorera ibikorwa by’ubuhinzi n’ubworozi.

Ashinjwa ibyaha birimo kutuzuza inshingano ze mu gucunga intwaro no kugira uruhare mu bushimusi by’umwihariko impunzi z’Abanyarwanda.

Ibi byaha byose arabihakana akavuga ko ari umwere.

Iri tabwa muri yombi kandi ryaje rikurikira iyirukanwa rye ku mwanya w’ubuyobozi bwa Polisi muri Mata 2018.

Gen.Kale Kayihura itangazamakuru rikoreshwa na ISO na CMI ryamwandikagaho inkuru zimushinja urupfu rwa Andrew Felix Kaweesi ariko iki cyaha kikaba kitaravuzweho mubyo ashinjwa mu rukiko hakaba hari abatangiye kwibaza uko bizagenda kandi hari abandi bapolisi bakuru bafashwe bafunzwe bashinjwa urupfu rwa Kaweesi kandi baravuze ko bakoranaga na Boss wabo.

Gen.Kale Kayihura ntago Museveni yari kumubabarira gutyo akamurekura kubera abamusabiye imbabazi yagomba kubanza kubinyuza mu rukiko kugirango biyererutse ko yatsinze akaba umwere.

 

 

 

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.