umu amakuru- Uyu munsi mu kwiyamamaza kwa Green Party Dr.Frank Habineza yahariye abandi bakandida kubwira abaturage ibyiza by’Ishyaka ryabo no kuvugana n’itangazamakuru | Umusingi

Uyu munsi mu kwiyamamaza kwa Green Party Dr.Frank Habineza yahariye abandi bakandida kubwira abaturage ibyiza by’Ishyaka ryabo no kuvugana n’itangazamakuru

Views:
108

Kuri uyu wa gatatu tariki 15 Kanama 2018 Ishyaka riharanira ibidukikije na Demokarasi cyangwa green Party of Rwanda biyamamarije mu Karere ka Kayonza kuri site ya Kabarondo na Kayonza mu mujyi ariko Dr.Frank Habineza akaba yahariye abakandida depite kuba aribo babwira abaturage imigabo n’imigambi y’Ishyaka ryabo.

Umunyamabanga Nshingwabikorwa w’Umurenge wa Mukarange muri Kabarondo niwe wakiriye Ishyaka rya Green Party aho Abakandida 4 aribo bagejeje ku baturage imigabo n’imigambi y’Ishyaka babasaba ko bazabatora umunsi w’itora ugeze muri abo harimo Hitimana Sylvestre, Bakuzakundi Alex, Mukangabe Veronique na Mujawimana Beatrice .

Imwe mu migabo n’imigambi yavugiwe I Kabarondo harimo kuvugurura uburezi ,harimo kugabanya imisoro ihanitse mu bucuruzi no gukuraho itegeko ry’ubutaka n’indi migambi myinshi.

Bavuye Kabarondo bakomereje I Mukarange muri Kayonza aho bakiriwe n’abayobozi batandukanye barimo Meya wa Kayonza Murenzi Jean Claude washimiye Green Party kuba yaje kwiyamamariza mu Karere ayoboye abaha ikaze ndetse ababwira ko umutekano uhari nta kibazo.

Aho ni Kabarondo aho Green Party yatangiriye kwiyamamaza kuri uyu munsi bamwe mu bayobozi

Umunyamabanga mukuru  w’Ishyaka rya Green Party mu Rwanda Jean Claude NTEZIMANA akaba yabwiye abanyamakuru igikorwa cyo kwiyamamaza muri Kayonza ko hari byinshi bazakemura muri Kayonza ndetse no mu gihugu cyose aho yagarutse ku mategeko ,avuga ku misoro yaba iy’ubutaka n’indi yakwaga abacuruzi aho yagize ati “Leta n’abaturage ntago bakwiye gutaka ko babangamiwe kandi aribo Leta ni nko gukama inka amata ukayayimaramo ariko utayihaye ubwatsi n’amazi twe tuzajya twumva ibyo abaturage bashaka tubikore niyo Leta nziza nibwo buyobozi bwiza bubereye abaturage icyo twifuza ni uko badutora tukabahindurira ibyo byose”.

Dr.Frank Habineza

Meya wa Kayonza Murenzi yakira Green Party ayiha ikaze

Ejo bari i Kirehe

Ku munsi w’ejo Green Party yiyamamarije mu Karere ka Kirehe naho bakaba barakiriwe n’umuyobozi w’Akarere ndetse n’umunyamabanga nshingwabikorwa w’Umurenge n’uwa Akagali.

Ariko mu minsi 3 ishize biyamamariza ahantu hafi y’isoko na gare abantu usanga basa n’abatinya kuza kuko haza abantu bacye ugereranije n’uburyo isoko riba ryaremye.

Mukangabe Veronique nawe wiyamamariza kuba umudepite cyangwa intumwa ya rubanda abajijwe icyo azakora ageze mu nteko ishingamategeko yavuze ko azita cyane ku mibereho y’abaturage bakarya neza ,bakaryama neza ,bakivuza neza ati “Mbese imibereho y’umuturage wese nicyo nzitaho cyane nkareba ko bafite amazi meza n’ibindi byinshi”.

Icyagaragaye uyu munsi ni uko abakandida bose bavugaga imigabo n’imigambi babishoboye kandi bazi kuvugana n’itangazamakuru bikaba byari bigamije kureba ko nibagera mu Nteko ishingamategeko bazashobora kuvugira rubanda bazaba babatumye.

Gatera Stanley

 

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.