umu amakuru- Umuyobozi w’ishuri rya Good Family yanze guhemba abakozi n’abarimu amezi 3 amafaranga yakabahembye ayaguriramo ibiryo by’inkoko | Umusingi

Umuyobozi w’ishuri rya Good Family yanze guhemba abakozi n’abarimu amezi 3 amafaranga yakabahembye ayaguriramo ibiryo by’inkoko

Views:
153

Tariki ya 5 Kanama 2018 Ikinyamakuru Umusingi cyagiye mu Karere ka Bugesera ku ishuri rya Good Family School  aho abarimu n’abakozi b’iryo shuri batangarije iki kinyamakuru ko bamaze amezi atatu badahembwa.

Uwitwa Nteziryayo Jean Pierre n’umunyamabanga akaba na kontabure w’icyo kigo yagize ati “Uyu munsi twaruhutse tumaze gutanga indangamanota z’abanyeshuri ku gihembwe cya kabiri ariko dufite ikibazo nk’abarimu twese hano n’abakozi muri rusange kuko umukoresha wacu witwa Harindintwari Aimable  amaze amezi atatu yose ataduhemba ubu tukaba dusaba ko mudukorera ubuvugizi tukareba ko twahembwa kuko twamenye ko amafaranga y’ikigo ayashyira mu bindi bikorwa bye nko korora inkoko twe akatwibagirwa”.

Iri shuri riherereye mu Murenge wa Rilima ,Akagali ka Nyabagendwa Akarere ka Bugesera rikaba rifite abanyeshuri 66 ,rikaba ari ishuri ry’incuke.

Harindintwari Aimable nyiri ikigo cya Good Family

Abarimu twaganiriye nabo

Iyo ugeze kuri icyo kigo ubona ari ikigo cyiza ndeste n’abana bahiga ubona basobanutse ariko nkuko abarimu babivuga ko igihembwe gitaha batazongera kuhigisha kubera ko badahembwa kandi ababyeyi bishyura ariko amafaranga nyiri ikigo akayajyana mu bindi bikorwa ku buryo n’umunsi w’abana kuruhuka ataje gusezera ku bakozi be.

Inkoko 500 yororera hafi y’ikigo bivugwa ko amafaranga ababyeyi bishyura ayaguramo ibiryo byayo matungo

Nyirabahire Philomene n’umwarimu kuri icyo kigo cya Good Family akaba yigisha mu wagatatu avuga ko amaze amezi atatu n’ikirarane cy’umwaka ushize batamwishyuye akaba avuga ko yagiye mu kiruhuko cyo kubyara akaba atarahembwe amafaranga ye kandi akaba atazasubira mu kazi atabanje guhembwa amafaranga ye.

Mushimiyimana Jean Paul ushinzwe isuku ku kigo akaba ari nawe uragira inkoko za nyiri ikigo akaba amaze amezi abiri atahembwa kandi ariwe wihahira akitekera akaba yaragize ati “Boss na mbere twagiranye ibibazo byo kutampemba tujya kumurenge turaserera anyishyuraho make kuyo namwishyuzaga ansaba gusubira mu kazi akajya anyishyura neza none amazi abaye abiri nkaba numva akazi ke nkarambiwe akwiye kuza akanyishyura nkajya gushaka akandi kazi”.

Niyotwagira Christine yaje ari umusimbura umubyeyi wari ugiye muri konji yo kubyara ati “Naje bambwiye ko hari akazi nziko ukwezi kuzajya gushira nkahembwa ariko ubu hashize amazi atatu tudahembwa ubu nkaba nibaza uburyo ndi butahe kuko iwacu ni Kumugina mu Karere ka Kamonyi nta mafaranga y’itike mfite yo kungeza iwacu kuko na nyiri ikigo twamubuze”.

Nsengimana Jean Marie Viany uhagarariye komite y’akanama ngishwa nama ku kigo cya Good Family School avuga ko badafite uburenganzira mu kwinjira mu mikorere y’ishuri kuko atari irya Leta ahubwo ko ibindi by’abakozi badahembwa byabazwa nyiri ikigo n’ubwo Nsengimana avuga ko yari yatumwe na nyiri ikigo ariko ntabindi byinshi yabazwa.

Ababyeyi bicaye mu ishuri baje kumva amanota y’abana babo

Ikinyamakuru Umusingi cyabajije nyiri ikigo cya Good Family School witwa Harindintwari Aimable kuwa 8 Kanama 2018 maze abajijwe impamvu atishyura abakozi be ahubwo amafaranga yakabahembye akayagurira amatungo ye ibiryo maze agira ati “Uranshakaho iki?ko nagusobanuriye ko ndi CHUK ukanga ukamampagara abo bakozi ko hari amategeko bagiye bakarega.

Njye nagusabye ko undeka kuko hari ibindi bintu ndimo nshaka kubanza kurangiza”.

Umwe mu babyeyi twavuganye nabo wari wazanye n’umwana we aje kumufatira amanota ye wadusabye  ko amazina ye adatangazwa yagize ati “Ibibazo by’abarimu badahembwa twarabyumvise ntacyo twabikoraho ariko nyiri ikigo yari akwiye kumenya impamvu yatangije ishuri tukazana abana bacu hano niba atagishoboye yariha urishoboye abana bacu bagakomeza bakiga kuko guhindagura abana sibyiza kandi abana barishyura sinzi rero impamvu twishyura ntiyishyure abarimu kandi birumvikana ko umwarimu atakwigisha umwana neza amaze amezi atatu yose adahembwa”.

Gatera Stanley

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.