umu amakuru- Abagororwa bahawe imbabazi barenga 700 barimo abagore 47 n’abana 19 bafunguwe by’agateganyo (Amafoto) | Umusingi

Abagororwa bahawe imbabazi barenga 700 barimo abagore 47 n’abana 19 bafunguwe by’agateganyo (Amafoto)

Views:
186

Gahunda yo gucyura abagororwa yatangiye 743 bari bafungiye muri gereza zitandukanye mu Rwanda barimo abagore 47 n’abana 19, bafunguwe by’agateganyo nk’uko byemejwe n’Inama y’Abaminisitiri yateranye ku wa 11 Nyakanga 2018 iyobowe na Perezida wa Repubulika, Paul Kagame.

Aba bagororwa bafunguwe barimo abari bahamijwe ibyaha ariko bisanzwe, bitarimo ibya Jenoside, ibyo kugambanira igihugu n’ibyaha by’ubugome.

Umuvugizi w’Urwego rw’Imfungwa n’Abagororwa, SSP Sengabo Hillary, yabwiye itangazamakuru ko abafunguwe bari bamaze 2/3 by’igihano cyabo muri gereza.

Yagize ati “Abafunguwe ni abari bamaze 2/3 by’igihano cyabo, ni na ba bandi bari bahamwe n’ibyaha bisanzwe bitarimo ibya Jenoside, kugambanira igihugu n’ibyaha by’ubugome kandi bitwaye neza muri gereza”.

Yizeye ko aba bagororwa bazitwara neza hanze ndetse baziteza imbere kuko hari imirimo myinshi bigiye muri gereza irimo ubwubatsi, gukora amashanyarazi, kudoda n’indi.

Mark Rugero wari warakatiwe imyaka itanu nyuma yo guhamwa n’icyaha cy’iyezandonke, yashimye Perezida Paul Kagame wabahaye imbabazi.

Yagize ati “Nari mazemo imyaka irenga ibiri kubera icyaha cy’iyezandonke ariko ndashimira perezida waduhaye izi mbabazi n’ubuyobozi bwa gereza bwadufashije kutugorora tukaba twumva buri wese yaramenye ububi bw’icyaha no kuba atakongera kukigwamo ukundi”.

Abagororwa bahawe imbabazi basohoka muri gereza batashye

Abari abagororwa babagore basohotse batashye

Umuvugizi w’Urwego rw’Imfungwa n’Abagororwa, SSP Sengabo Hillary,aganira n’itangazamakuru

Yakomeje avuga ko agiye gufatanya n’abandi banyarwanda guharanira icyateza igihugu imbere no gukangurira abandi kutagwa mu byaha.

Itegeko Nshinga ry’u Rwanda mu ngingo yaryo ya 109 ivuga Perezida wa Repubulika afite ububasha bwo gutanga imbabazi mu buryo buteganywa n’amategeko kandi amaze kubigishamo inama Urukiko rw’Ikirenga.

Ingingo ya 245 y’iri tegeko isobanura ko uwakatiwe igihano kimwe cyangwa byinshi by’igifungo cyangwa uwashyizwe mu maboko ya Leta ashobora gufungurwa by’agateganyo kubera impamvu zirimo; kuba yagaragaje ibimenyetso bihagije by’ubwitonzi, agaragarwaho impamvu nyakuri zihamya ko azabana neza n’abandi.

Kuba arwaye indwara ikomeye idashobora gukira, byemejwe n’itsinda ry’abaganga nibura batatu bemewe na Leta cyangwa yujuje igihe giteganywa n’ingingo ya 246 y’iri tegeko hakurikijwe ibyaha yahamijwe.

Ingingo ya 246 ivuga ko usaba gufungurwa by’agateganyo ashobora kubyemererwa iyo yakatiwe igifungo kitarengeje imyaka itanu akaba amaze gufungwa kimwe cya gatatu cyayo; iyo yakatiwe igifungo kirengeje imyaka itanu akaba amaze gufungwa bibiri bya gatatu byayo; gusa iyo yakatiwe igifungo cya burundu cyangwa icya burundu y’umwihariko ntashobora gufungurwa by’agateganyo atarangije imyaka makumyabiri y’igifungo.

 

 

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.