umu amakuru- Inzobere mu ndwara z’uruhu basabye ko amavuta yitwa mukorogo abagore bisiga acibwa | Umusingi

Inzobere mu ndwara z’uruhu basabye ko amavuta yitwa mukorogo abagore bisiga acibwa

Views:
255

Abahanga mu byerekeye imiti (Pharmacists) n’abaganga b’inzobere bahuriye i Kigali mu nama yari igamije kungurana ibitekerezo ku buryo bwo gukumira no kurwanya indwara z’uruhu, bakomoza ku bubi bw’uruvangitirane rw’amavuta.

Iyi nama yize ku buryo bwo kwita ku ruhu no kuvura indwara zifata uruhu, yavugiwemo ko mu ndwara zirufata zihangayikishije benshi barimo abihinduza uruhu bisiga amavuta ya mukoroga.

Impuguke mu bijyanye n’indwara z’uruhu, Dr Gahongayire Francoise, yavuze ko ahanini abisiga za mukorogo batabanza kumenya ibyo zikorwamo, kandi akenshi usanga ari imiti ivangwavangwa igira ingaruka nyinshi.

Dr Gahongayire Francoise abajijwe niba abona mukorogo zikwiyiye gucibwa yagize ati “Mukorogo n’amavuta bavangavanga bagamije kwitukuza ariko usanga abo bantu batazi ibyo uruhu rwabo rukeneye n’ibyo rudakeneye bakagura gusa bagatangira kwisiga ugasanga ayo mavuta abateye amabara ku mubiri kandi kuyakira bishobora gutinda cyane cyangwa bikabahenda cyane nkaba nsanga mukorogo zikwiye gucibwa nkuko baca ibindi byose bitemewe”.

Uwambajineza Tito Perezida wa (OPHI)

Umuhanga mu by’imiti uyobora Umuryango Nyarwanda ugamije kurushaho kuzamura ubuzima rusange bw’abaturage (OPHI)Organization for Public Healthy Improvement) Uwambajineza Tito, yavuze ko aya mavuta ya mukorogo ari ibintu bikorwa n’abantu ahanini baba batabifitiye ubumenyi buhagije.

Yagize ati “Ibya mukorogo ni ibintu bikorwa n’abantu badasobanukiwe icyo umuti aricyo, kubera ko iyo uri umuhanga mu by’imiti uba uzi ngo niba ari imiti ugiye kuvanga, urayivanga ku ruhe rwego, urashyiramo niba wenda nabyita nk’ubukana.

Dr Gahongayire Francoise wa kabiri uturutse ibumoso na Dr.Kayitesi uhera iburyo

Ubukana bw’uyu muti nimbuvanga n’ubwuyu burakemura ikibazo umuntu afite? Ibyo ngibyo rero bikorerwa inyingo ukanabyemererwa n’inzego zigiye zitandukanye ntabwo ari ibintu ujya ahantu hihishe ukavangavanga ugahereza abantu”.

Ayo mavuta yitwa mukorogo ntiharamenyekana aho avangirwa ariko benshi mu bagore muri iki gihe usanga bisiga mukorogo bashaka kuba inzobe n’ubwo hari n’abagabo bake bayisiga ariko Dr Gahongayire Francoise avuga ko hari amavuta meza bakwiye kwisiga bakagira uruhu rwiza kandi rukeye aho kujya kwisiga izo za mukorogo zikabangiriza uruhu rwabo.

Hari amakuru avugwa ko hari abantu benshi basigaye batinya gusohoka mu mazu yabo kubera isoni z’uruhu rwabo rwagiyeho amabara bitewe no kwitukuza bisiga za mukorogo akaba agira inama abantu bose bashaka kwitukuza kujya babanza kugana muganga akabahitiramo amavuta meza bakoresha atabagiraho ingaruka.

Muri iyo nama havugiwe ibijyanye n’indwara za sinezite nazo zimereye nabi abantu cyane cyane abana aho Dr.Kayitesi Kayitankore yavuze ko abana baba bakwiye kuba mu nzu isukuye ,tapi zo mu nzu zisukuye cyane ,matora abana baryamaho idapfukapfuka kuko nayo nimbi ku buzima bw’abana ndetse avuga ko ababyeyi baba bakwiye kujyana abana kwa muganga mbere yo kubatangiza amata kuko hari abo bayaha bakagira sinezite.

 

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.