umu amakuru- 20 muri 40 banduye agakoko gatera SIDA mu ishyirahamwe ryabakora uburaya muri Kirehe | Umusingi

20 muri 40 banduye agakoko gatera SIDA mu ishyirahamwe ryabakora uburaya muri Kirehe

Views:
162

Guhera kuwa 14 kugeza kuwa 16 Kamena 2018 Ishyirahamwe ry’Abanyamakuru bashinzwe kurwanya SIDA mu Rwanda ABASIRWA bari mu Karere ka Kirehe aho bari bagiye kureba uko ingamba zo kurwanya SIDA zihagaze maze baganira na bamwe mu bakora uburaya muri Kirehe aho 20 muri 40 bagize iryo shyirahamwe banduye agakoko gatera SIDA.

Mu cyumba cy’inama mu Karere ka Kirehe niho inama yabereye y’abanyamakuru baganira na bamwe bakora uburaya muri Kirehe bari mu ishyirahamwe ryitwa Twiyubake n’ubwo hari bamwe bataryemera ariho umuyobozi w’iryo shyirahamwe witwa Niyomubyeyi Anna yavuze ko ishyirahamwe ryabo ryari rifite abanyamuryango 60 ariko kubera inzego z’ibanze kubarwanya cyane bamwe bakajya za Tanzania na Uganda no mu bindi bice bitandukanye ubu basigaye ari 40 ariko muri abo 40 makumyabiri (20)banduye agakoko gatera SIDA.

Bamwe mu bakora uburaya bavuze ko bakoresha udukingirizo ndetse n’umuyobozi w’ibitaro bya Kirehe Ngamije Patient yari yabwiye abanyamakuru mu kiganiro bagiranye mu bitaro bya Kirehe ko udukingiro badutanga ahantu henshi harimo naho abantu benshi bahurira ndetse n’abakora uburaya babaha utwo dukingirizo ariko abantu bakibaza impamvu abantu 20 muri 40 banduye?umubare utari muto.

Uhereye ibumoso Innocent Bahati umunyamabanga nshingwabikorwa wa ABASIRWA na Frank Mugabo ushinzwe ubuzima mu Karere wambaye kositime n’ushinzwe imiyoborere myiza mu Karere ka Kirehe baganira n’abanyamakuru

Niyomubyeyi Anna yasobanuye ko hari abaza mu buraya ari bashya bakabitangira bihishahisha ariho bandurira ariko abamazemo iminsi nta n’umwe wakorera aho nta gakingirizo.

Niyomubyeyi yagize ati “Hari abaza mu buraya ari bashya bakaza ku munsi w’isoko bagakora bagasubirayo gutyo gutyo bikazarangira aje burundu ariko iyo tubamenye turabegera tukaganira nabo tukabigisha kwirinda SIDA n’izindi ndwara zandurira mu mibonano mpuzabitsina ariko bamwe baba baramaze kwandura muri uko gukora bihisha ariko abo tumenye tukaganira nabo ntawongera gukorera aho adafite agakingirizo”.

Umwe mu bakora uburaya atarashatse ko amazina ye atangazwa mu kinyamakuru yagize ati “Abanduye SIDA bayanduye cyera mu bujiji ariko ubu utarayanduye ntiyayandura kuko twarigishijwe bihagije umugabo wese ushaka gukorera aho ntitwamwemerera .Uramwangira agasohoka ukemera niyo waba wabuze ayo kurya ugasaba mugenzi wawe Magana atanu ugahaha ukarya aho kwishora mu mibonano idangiye ukaba wakwandura SIDA cyangwa ugatwara inda”.

Icyagaragaye mu biganiro hagati y’abanyamakuru nabakora uburaya ni uko abakora uburaya ntazindi mfashanyo bahabwa ziturutse mu nzego uretse udukingirozo n’inyigisho aribyo abantu bashobora gushingiraho bavuga ko abantu 20 muri 40 kuba baranduye SIDA ari benshi kandi ishyirahamwe ryabo ryakabaye riterwa inkunga bakabona ibyo bakora bituma bava mu buraya nkuko ahandi ABASIRWA yasuye hari amashyirahamwe yabakora uburaya afite ibikorwa bitandukanye.

Umuyobozi ku rwego rw’Akarere ka Kirehe ushinzwe ubuzima wari uhari muri icyo kiganiro n’abanyamakuru hamwe nabakora uburaya ku kibazo kijyanye n’imfashanyo yo gufasha abakora uburaya Mugabo Frank yavuze ko nta nkunga ifatika mu bijyanye n’amafaranga baha abakora uburaya uretse kubigisha no kubaha ubukangurambaga n’udukingirizo gusa.

Perezida wa ABASIRWA Frank Ndamage akaba yaragiriye inama Akarere gufasha abakora uburaya gushaka ubakorera imishinga ibyara inyungu ikabafasha kubona akazi bakibeshaho badategereje amaramuko mu buraya ati “Bakoze imishinga ibyara inyungu Akarere ntikabura abaterankunga aba bantu bakabona akazi dore ko bavuga ko babonye icyo bakora uburaya babureka”.

Imishinga n’imyinshi bashobora gukora nko gukora saloon isuka imisatsi cyangwa yogosha ,gukora restora,korora amatungo,guhingisha imyaka basarura bakayigurisha n’indi myinshi cyane irashoboka ko bayikora bakava mu buraya kandi biba bigabanije uburaya ndetse na SIDA iba irwanijwe.

Gatera Stanley

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.