umu amakuru- Ibyo kwa Rwigara biracyakomeje :Imashini zikora itabi z’abo zigiye gutezwa cyamunara nazo | Umusingi

Ibyo kwa Rwigara biracyakomeje :Imashini zikora itabi z’abo zigiye gutezwa cyamunara nazo

Views:
119

Imashini zikoreshwa mu gutunganya itabi ry’uruganda ‘Premier Tobacco Company Ltd’, rw’umuryango wa Rwigara Assinapol, zigiye gutezwa cyamunara kugira ngo haboneke ubwishyu bw’ibirarane by’imisoro ubereyemo Ikigo cy’Igihugu gishinzwe imisoro n’amahoro.

Iki kigo kivuga ko kishyuza ibirarane by’imisoro bya miliyari esheshatu z’amafaranga y’u Rwanda, byo guhera mu 2012 uruganda ‘Premier Tobacco Company’ rubereyemo leta.

Nk’uko itangazo rya cyamunara ribivuga ‘Umuhesha w’Inkiko w’umwuga, aramenyesha abantu bose ko ku wa Mbere tariki 11 Kamena 2018, saa yine za mu gitondo hazagurishwa mu cyamunara imashini zikoreshwa mu gutunganya itabi z’uruganda Premier Tobacco Company Ltd, cyamunara ikazabera aho uruganda rwubatse i Gikondo muri Parc Industriel’.

Iri tangazo ryashyizweho umukono na Me Habimana Vedaste, rivuga ko gusura ibigurishwa mu cyamunara byatangiye kuri uyu wa Kabiri tariki 5 Kamena 2018, saa munani z’amanywa ku ruganda.

Mu mpera za Werurwe uyu mwaka, amakarito manini 7195 y’itabi ry’uruganda ‘Premier Tobacco Company Ltd’ yatejwe cyamunara, rigurwa na Murado Business Ltd, amafaranga y’u Rwanda miliyoni 512.

Iri tabi ryari mu bubiko bw’uruganda i Gikondo muri Parc Industriel, ririmo amoko atanu ari yo Premier Filter (amakarito 5553); Filter Star (amakarito 1033); Filter Star King (amakarito 328); Premier Super Menthol (amakarito 191) na Filter Star Soft (amakarito 90). Buri karito imwe irimo imiti (pieces) y’itabi 5000, ni ukuvuga imiti irenga miliyoni 35 ku giteranyo cy’amakarito yose.

Ikigo gishinzwe imisoro n’amahoro cyatangaje ko bitewe n’uko amafaranga yavuye muri iyi cyamunara atishyura imisoro yose umuryango wa Rwigara ubereyemo leta, asigaye azashakwa mu yindi mitungo bafite ikaba ariyo mpamvu hagiye gutezwa cyamunara amamashini akora itabi kugirango ayishyuzwa yose aboneke.

 

 

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.