umu amakuru- Ikipe y’Amagaju FC yatsinze Rayon Sports (Biritwa umwaku se ?) | Umusingi

Ikipe y’Amagaju FC yatsinze Rayon Sports (Biritwa umwaku se ?)

Views:
74

Kuri uyu wa kabiri tariki 5 Kamena 2018 Ikipe y’Amagaju FC yatsinze Rayon Sports ibitego bibiri kuri kimwe mu mukino w’ikirarane w’umunsi wa 22 wa shampiyona wabereye kuri Stade Amahoro i Remera.

Rayon Sports iri mu rugamba rwo kwisubiza igikombe ikomeje kugorwa mu mikino ya shampiyona kuko yananiwe gutahana amanota atatu mu gihe Amagaju FC bakinaga yaburaga abakinnyi bayo b’imena barimo umunyezamu Twagirimana Pacifique na Manishimwe Jean de Dieu bavunitse ndetse na Irakoze Gabriel na Kapiteni Bizimana Noël barwaye.

Amagaju FC atozwa na Habimana Sosthène “Lumumba” wahuraga n’ikipe ya Rayon Sports yahozemo, yakiniraga ku gitutu cyo gushaka amanota ayiha icyizere cyo kuguma mu cyiciro cya mbere mu gihe Umutoza Ivan Minnaert n’abakinnyi be bakubanaga no kwiruka kuri APR FC ya mbere.

Iyi kipe yo mu Majyepfo yinjiye mu mukino mbere ndetse iza kunyeganyeza inshundura za Ndayishimiye Eric Bakame inshuro ebyiri, bishyira mu ihurizo Rayon Sports ryo kubigombora no kubona intsinzi ariko ntiyahiriwe.

Ikipe y’Amagaju

Ikipe ya Rayon Sports

ibitego by’Amagaju FC byatsinzwe na Moustapha Yahaya ku munota wa 30 na Munezero Dieudonné ku wa 38 mu gihe igitego rukumbi cya Rayon Sports cyatsinzwe na Manishimwe Djabel ku mupira yari ahawe na Hussein Tshabalala wahuraga bwa mbere n’ikipe yahozemo.

Amanota atatu Amagaju yabonye yayifashije kwicuma imbere agera ku mwanya wa 12 ku rutonde rwa shampiyona n’amanota 27, mu gihe Rayon Sports iri ku mwanya wa gatatu n’amanota 44 inyuma ya AS Kigali ya kabiri ifite 48 na APR FC iruyoboye n’amanota 50, zose uko ari eshatu zimaze gukina imikino 24.

Abakinnyi babanjemo ku mpande zombi:

Rayon Sports: Ndayishimiye Eric Bakame, Rwatubyaye Abdul, Ange Mutsinzi, Mugabo Gabriel, Rutanga Eric, Mugisha Gilbert, Niyonzima Olivier Sefu, Mugisha François, Christ Mbondi, Manishimwe Djabel na Shaban Hussein Tshabalala.

Amagaju FC: Muhawenayo Gad, Yumba Kaite, Rutayisire Egide, Célestin Kibuye, Hakizimana Hussein, Ndikumana Trésor, Moustapha Yahaya, Munezero Dieudonné , Dusabe Jean Claude, Ndizeye Innocent na Ndikumana Bodo.

 

 

 

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.