umu amakuru- Uganda: Abapolisi 4 bakuru bafunzwe bazira kurekura Abanyarwanda 13 bari batawe muri yombi | Umusingi

Uganda: Abapolisi 4 bakuru bafunzwe bazira kurekura Abanyarwanda 13 bari batawe muri yombi

Views:
268

Urwego rushinzwe iperereza mu gisirikare cya Uganda (CMI) rwataye muri yombi abapolisi bane (4) bakuru bakorera mu Karere ka isingiro mu burengerazuba bw’igihugu, aho bari kubazwa ku irekurwa ry’ Abanyarwanda 13 bivugwa ko bari binjiye mu gihugu mu buryo bunyuranije n’amategeko.

Abo bapolisi bakuru batawe muri yombi bose bafungiye i Kampala ku cyicaro Urwego rushinzwe iperereza mu gisirikare cya Uganda (CMI) aho barimo guhatwa ibibazo.

Aba bapolisi uko ari bane ni SP Richard Erimu Okiror, wayoboraga Polisi mu Karere ka Isingiro na ASP Charles Ndamanyire wari ushinzwe Ubugenzacyaha muri ako karere na Amos Kiriya wari ushinzwe impunzi muri Oruchinga, Carthbert Washaba wari ushinzwe abinjira n’abasohoka Mbarara .

Chimpreports dukesha iyi nkuru ivuga ko aba bapolisi bakuru batawe muri yombi ku wa Gatanu mutagatifu tariki 30 Werurwe 2018, bajyanwa i Kampala gukorwaho iperereza bikaba bigeze magingo aya batararekurwa.

Charles Ndamanyire-OCCID Isingiro

Amos Kiriya, the Commandant Oruchinga Refugee Camp

Uretse aba bapolisi bane bakomeye CMI yataye muri yombi, hari n’abandi bashinjywa kugira ubufatanyacyaha n’aba bapolisi .

Amakuru aturuka mu nzego z’umutekano avuga ko abakekwa batangiye guhura n’ibibazo hagati mu kwezi gushize, ubwo Abanyarwanda 13 binjiraga muri Uganda banyuze Kisoro bagafatwa na polisi bageze i Mbarara.

Bivugwa ko abo bapolisi babashyikirije urwego rushinzwe abinjira n’abasohoka muri Mbarara ngo hagenzurwe ibyangombwa by’inzira byabo ndetse banamenye ikibagenza muri Uganda nyuma baza kujyanwa mu nkambi ya Oruchinga ndetse na dosiye zabo zishyikirizwa polisi ya Isingiro ngo izikurikirane.

Mu kugenzura ibyo byyangombwa abo banyarwanda bari bafite, ngo basanze nta kibazo bifite byose byuzzuye bahita barekurwa nk’uko Chimpreports yakomeje ibivuga.

CMI ngo yaje kubona amakuru ko abo bantu bari muri Uganda mu buryo bunyuranyije n’amategeko, ko binjiyeyo ku mpamvu zitazwi. Imaze kumenya ko barekuwe ngo yihutiye i Mbarara, ihita itumiza inama ku wa 30 Werurwe 2018 ku cyicaro cya Polisi ku rwego rw’Intara ahitwa Rwizi mu biro bya RPC Robert Walugembe.

CMI yahise itumiza igitaraganya na ba bapolisi babarekuye basabwa gusobanura uko baretse abo banyamahanga bakagenda.Inama irangiye ba bapolisi bakuru bahise burizwa imodoka bajyanwa i Kampala ndetse kugeza na magingo aya bakaba batararekurwa.

Umuvugizi w’igipolisi mu gace ka Rwizi Samson Kasasira yahamirije Chimpreports ko amakuru y’itabwa muri yombi ry’aba bapolisi bakuru ariyo, avuga ko bakiri guhatwa ibibazo ku irekurwa ry’abanyarwanda 13 ryakozwe mu buryo bunyuranyije n’amategeko.

 

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.