umu amakuru- Koperative y’abakora uburaya I Huye bamaze gushyingira abakobwa 10 bakabakorera ubukwe | Umusingi

Koperative y’abakora uburaya I Huye bamaze gushyingira abakobwa 10 bakabakorera ubukwe

Views:
596

Kuwa 21 Ukuboza 2017 Ishyirahamwe ry’Abanyamakuru bashinzwe kurwanya SIDA n’izindi ndwara mu Rwanda ABASIRWA bari mu Karere ka Huye aho bari bagiye kureba uko ikibazo cya SIDA gihagaze muri ako Karere.

Umunyamabanga nshingwabikorwa wa ABASIRWA Innoc Bahati niwe wabanje gusobanurira abanyamakuru impamvu bagiye I Huye ko ari gahunda ya ABASIRWA yo gusura uturere twose mu rwego rwo kureba aho ikibazo cya SIDA kigeze kuko avuga ko hari aho usanga iri hejuru ahandi yaragabanutse bityo ahakeneye ubuvugizi bugakorwa hifashishijwe itangazamakuru.

ABASIRWA ikaba imaze gusura Akarere ka Rubavu kubera umupaka uhuza u Rwanda na Congo hakaba hari abakora uburaya bivugwa ko akenshi aribo bakwirakwiza agakoko gatera SIDA ndetse bakaba barasuye Cyanika ,ubu bakaba bafite gahunda yo gusura Rusumo naho hari umupaka uhuza u Rwanda na Tanzania.

Ni muri urwo rwego abanyamakuru bari bagiye muri Huye kureba uko ikibazo cya SIDA gihagaze maze basura Koperative y’abakora uburaya yitwa Akariza mu rwego rwo kubabaza ibibazo bahura nabyo bishobora gutuma bandura SIDA.

Iyi Koperative yitwa Akariza ifite abanyamuryango 60 ariko 40 muri bo bafite agakoko gatera SIDA.

Perezidante w’iyo Koperative Akariza witwa Niyokamara Franscine yabwiye abanyamakuru ko ikibazo bafite ari uko inzego z’ibanze zitabaha ubufasha kandi bafite imishinga yabafasha no kuva muri ubwo buraya.

Umunyamabanga nshingwabikorwa wa ABASIRWA Innoc Bahati

Niyokamara yagize ati “Nk’ubu dufite aho guhinga ndetse dufite n’amatungo ariko usanga tuyaragiza bamwe mu banyamuryango ariko inzego z’ibanze ziduteye inkunga twahingisha ndetse tugakora n’ubworozi bwa kijyambere ariko twe ntibadufasha ahubwo twumva ko hari andi mashyirahamwe bafasha”.

Visi Meya ushinzwe imibereho myiza y’abaturage mu Karere ka Huye Niwemugeni Christine

Niyokamara yavuze ko n’ubwo bafite ibibazo by’amikoro ariko nanone bishimira ko bamaze gushyingira abakobwa bagenzi babo 10 kandi bakaba bafite ikifuzo ko n’abandi batarabona abagabo bababona bakava mu buraya.

Niyokamara yavuze ko muri Koperative yabo bamaze gushyingira abakobwa 10 bakabatahira ubukwe ndetse nawe yemeza ko mu minsi itari iya kure azatumira inshuti n’abavandimwe mu bukwe bwe.

Umwe mu bakora uburaya tutashatse kuvuga amazina ye ariko ubona akiri muto avuga ko afite imyaka 20 ndetse afite abana 2 avuga ko gukora uburaya abiterwa n’ubukene kuko aba ashaka icyamubeshaho ndetse no gutunga murumuna we babana n’abana be.

Ku bijyanye n’amafaranga akorera ku munsi avuga ko biterwa n’abakiriya aba yabonye ati “Hari igihe haza abakire na Makumyabiri nayamuca ariko hari igihe haza abo ubona badafite amafaranga na bibiri (2000Rfw)nkayafata kuko nayo sinayasiga”.

Kuwa 22 Ukuboza 2017 abanyamakuru bakorera mu Ishyirahamwe rya ABASIRWA bahuye na Christine Niwemugeni Visi Meya ushinzwe imibereho myiza y’abaturage mu Karere ka Huye maze abajijwe ku bijyanye no gufasha Koperative Akariza avuga ko hari abo bajyaga baha amafaranga yigishoro bakayakoresha nabi ariko avuga ko nabo bazabegera bakaganira nabo bakarebe icyo babafasha.

Visi Meya Niwemugeni yavuze no ku kibazo gituma bamwe bajya mu buraya aho yavuze ko abenshi usanga baravuye iwabo mu cyaro baje gukora akazi ko mu rugo bagahembwa udufaranga duke.

Visi Meya yakomeje avuga ko iyo uwo mukozi ahembwa udufaranga duke kandi afite ibyo akenera ndetse no gufasha umuryango we niho batangira ku mushuka ko azabona amafaranga menshi bikarangira yishoye mu buraya.

Niwemugeni nanone yagize ati “Abandi bashwana n’ababakoresha bakabirukana bityo bakanga gusubira mu cyaro bagatangira kwishakishiriza imibereho bikabananira bagahita gukora uburaya ariko abakozi bahembwe neza hari icyo byagabanya”.

Perezida wa ABASIRWA Ndamage Frank yabwiye Visi Meya Niwemugeni Christine ko ABASIRWA ifite gahunda ndende yo gukora ubuvugizi abaturage bakamenya kwirinda SIDA n’izindi ndwara zandurira mu mibonano mpuzabitsina binyujijwe mu bitangazamakuru bitandukanye ndetse akaba yifuza ko Uturere na za Minisiteri n’imishinga yigenga bakorana na ABASIRWA kugirango Abanyarwanda bagire ubuzima bwiza.

Amakuru avuga ko muri Huye kubera ari Akarere kegeranye n’umupaka uhuza u Rwanda n’uBurundi byoroshye abantu kwandura agakoko gatera SIDA kubera bamwe baba bambuka baza mu Rwanda abandi bajya I Burundi bityo muri Huye abafite agakoko gatera SIDA bakaba bageze kuri 1.8 kandi abenshi bivugwa ko ari abagore.

Gatera Stanley

 

 

 

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.