umu amakuru- Abunzi bahawe imbaraga zo kugeza ubutabera k’umuturage wo hasi | Umusingi

Abunzi bahawe imbaraga zo kugeza ubutabera k’umuturage wo hasi

Views:
58

Kuwa 31 Kanama 2017 I Kigali St.Paul habereye umuhango wo gusoza amahugurwa y’Abunzi ,Abayobozi b’imirenge n’utugari n’abashinzwe irangamimerere baturutse mu Turere 5 agamije kubongerera imbaraga mu gukemura ibibazo by’abaturage.

Abanzi bazajya babanza bahuze abaturage bafitanye ibibazo cyane cyane amasambu,abambuye abandi amafaranga,abishe amasezerano n’ibindi babahuze mu rwego rwo kubunga kugirango ikibazo gikemuke aho kwirirwa mu Nkiko.

Abunzi ntago bize amategeko ariko na cyera abantu baricaraga bakumva uko ikibazo giteye bashingiye kubyo bamaze kumva ku mpande zombi bityo bagafata umwanzuro.

Gusa Abunzi ntago bunga ibibazo byo mu ngo z’abantu aho umugabo n’umugore bagirana ubutumvikana cyangwa ibindi bibazo mu miryango ibyo ngo bikemurwa n’inshuti z’umuryango.

Mugabo Frank ushinzwe guhuza ibikorwa byo kwegereza abaturage ibikorwa by’ubutabera muri Minisiteri y’ubutabera yagize ati “Abunzi bagiye kudufasha kwegereza abaturage ubutabera kuko babubona hafi kandi butabahenzi kikaba kimwe mu bisubizo kugirango iterambere rigerweho”.

Mugabo Frank yakomeje ari nawe wasoje amahugurwa ya Bunzi kumugaragara yakomeje avuga ko ubusanzwe abaturage bajyaga bagura ubutabera,iyo bagiye gutanga ikirego hari amafaranga bishyurwaga ariko ubu Abunzi bagiye kubagabanyiriza bimwe nk’ayo mafaranga abaturage bishyuraga ntibazongera kuyishyura.

Abunzi ni urwego rwemewe n’amategeko ariko n’ubwo batize amategeko ariko umwanzuro wabo uba itegeko.

Ubusanzwe wasangaga abaturage bagorwa bashaka amafaranga yo gutanga ibirego bikabatinza ariko ubu bazajya batanga ikirego ku kagari hanyuma bahuzwe n’abunzi ibibazo babikemure bitiriwe bijya mu Nkiko.

Musonera Pascal umwe mu Bunzi wahuguwe akaba yizeza abantu ko ibyo bahuguwe bigiye kubafasha mu rwego rw’ubumenyi buzabafasha gukemura ibibazo by’abaturage.

Musonera yagize ati “ubundi uko dukora haba hari igitabo ku Kagari iyo hagize umuturage ugira ikibazo yandika muri yak aye bagahabwa iminsi 7 noneho inteko y’Abunzi igahura n’abo bantu bakumva ikibazo cyabo bityo inteko ikiherera igafata umwanzuro kandi tubikorana ubunyangamugayo”.

Abahuguwe baturutse mu Turere twa Nyarugenge ,Gicumbi,Burera,Ngororero na Nyabihu.Abunzi bahuguwe ni 3108,Abanyamabanga Nshingwabikorwa b’Imirenge n’Utugari bagera kuri 444 naho abashinzwe ibiro by’irangamimerere mu Mirenge bagera kuri 73.

Iyi gahunda ishyirwa mu bikorwa ku  bufatanye na Minisiteri y’Ubutabera ku nkunga yatanzwe na Ambasade y’Ubwami bwa Suwede mu Rwanda (Sida).

Iyi gahunda nkuko ivugwa Abunzi bakoze neza yakemura ibibazo byinshi n’imanza zikaba nkeya mu Nkiko mu gihe umuntu yashoboraga gutanga ikirego kubera ubwinshi bw’ibirego akaba yamara amezi arenga 6 ataraburana ariko ubu birashoboka ko umuntu atazajya amara n’ukwezi Abunzi nibakemura ibibazo vuba kandi neza nkuko aribyo babitezeho.

Mu bindi bihugu bimaze gutera imbere umuntu arafatwa uwo munsi akagezwa imbere y’umucamanza cyangwa imanza z’amakimbirane nazo ntizitinzwe none Abunzi nabo bakaba bagiye kubikemura kugirango ubutabera bwihuse kandi bunoze bugere ku ku muturage wo hasi.

Uyu muhango kandi wari witabiriwe n’abayobozi bakomeye barimo Visi Meya ushinzwe ubukungu mu Karere ka Nyarugenge ndetse na Perezida w’umushinga RCN Hugo Moudiki JOMBWE na Mugabo Frank waturutse muri Minisiteri y’Ubutabera n’abandi benshi.

Gatera Stanley

About author

Related Articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.